Ձեր վստահելի աղբյուրը

«Օրինաց երկիր» խմբակցության անդամ Իշխան Խաչատրյանն Ազգային Ժողովում կարծիք հայտնեց, որ ժողովուրդը չի վստահում ընտրական գործընթացներին:

«ՏԻՄ ընտրություններն էլ փաստում են, որ իրականում հասարակությունը մի հաստատուն կարծիք է արտահայտում, միևնույն է՝ ում էլ որ ընտրենք, իշխանությունը կամ Կենտրոնական ընտրական հանձնաժողովն ում ուզի նրան էլ հաղթող կհայտարարի»,-ասաց պատգամավորը:

Խաչատրյանը նշեց, որ ընտրական գործընթացների նկատմամբ վստահության բարձրացման խնդիր կա, ապա ԿԸՀ նախագահ Տիգրան Մուկուչյանին հարց տվեց. «Ընտրակեղծիքների հետ կապված մենք ունե՞նք պատասխանատվություն կրող ընտրատարածաքային ընտրական հանձնաժողովների անդամներ»:

ԿԸՀ նախագահն ի պատասխան թվեր ներկայացրեց վերջին ՏԻՄ ընտրություններից. «377 համայնքներում տեղի ունեցան ՏԻՄ ընտրություններ, որոնցից համայնքի ղեկավար էին ընտրում 299 համայնքներում: Դրանցից 52 տոկոսում մրցակցային ընտրություններ էին, այսինքն ունենք 2 և ավելի թեկնածուներ»:

Մուկուչյանը 52 տոկոսը ՏԻՄ ընտրությունների ժամանկ լուրջ ցուցանիշ է համարում, նշում է, որ այդ համայնքներում եղել է լիակատար հասրակական վերահսկողություն թեկնածուների, նրանց վստահված անձանց, դիտորդների, ԶԼՄ ներկայացուցիչների կողմից:

«62 համայններում ընտրվեցին ընտրվեցին նոր ղեկավարներ, որոնցից յոթը նոր համայնքներ էին՝ առաջացած խոշորացման արդյունքում, 16 համայնքում գործող ղեկավարները չէին առաջադրվել, 39 համայնքներում գործող ղեկավարները պարտվեցին: Սա հենց պատասխանն է այն հարցին, որ եթե ժողովուրդը չվստահեր, չէր գնա և ոչինչ չէր փոխվի: Նշանակում է, վստահում են, գնում են և իրենց քվեարկությունն է, որ որոշում է արդյունքը»,-ասաց Մուկուչյանը:

Նրա խոսքով, ընտրական գործընթացներում ոչ պակաս ներգրավվածություն ունեն ԱԺ-ում ներկայացված խմբակցությունները՝ ընտրատեղամասերի հանձնաժողովներում իրենց ներկայացուցիչներին նշանակելով:

«Դա իմ կարծիքով, պետք է ընկալվի ոչ միայն իրավունք, այլև պատասխանատվություն»,-ասաց ԿԸՀ նախագահը:

Ինչ վերաբերում է քրեական գործերին, ապա Մուկուչյանն ասաց՝ իհարկե եղել են, դրանց մասին մամուլում գրվել է: Սեպտեմբերի 18-ի ընտրությունների վերաբերյալ ԸԸՀ-ները 8 դեպք ուղարկել են իրավապահ մարմիններին՝ քննություն իրականացնելու համար, հոկտեմբերի 2-ի ընտրությունների վերաբերյալ բողոքները դեռ ամփոփվում են: