Ձեր վստահելի աղբյուրը

«Բանանց» ֆուտբոլային ակումբը երեկ հաղորդագրություն տարածեց այն մասին, որ երկկողմ համաձայնությամբ խզել է պայմանագիրը թիմի գլխավոր մարզիչ Տիտո Ռամալյոյի հետ: Իսպանացի մասնագետն իր մարզչական շտաբով հեռացավ` տեղը զիջելով Հայաստանի ֆուտբոլի ազգային հավաքականի նախկին ֆուտբոլիստ Արթուր Ոսկանյանին, ով 2011 թ. ավարտելով կարիերան` անցել է մարզչական գործունեության:

Ընթացիկ մրցաշրջանում Ոսկանյանի գլխավորած «Բանանց-2»-ը Հայաստանի առաջին խմբի առաջնությունում 100 տոկոսանոց ցուցանիշ է գրանցել` 8 խաղում տոնելով 8 հաղթանակ և վաստակած 24 միավորով միանձնյա գլխավորում է մրցաշարային աղյուսակը: Մարզչական հստակ ձեռագիր, գեղեցիկ հաղթանակներ ու էլ ավելի գեղեցիկ գոլեր…  Կարող ենք միանշանակ ասել, որ Արթուր Ոսկանյանը «Բանանցի» գլխավոր թիմին շատ բան կարող է տալ:

Իհարկե, Տիտո Ռամալյոյի կատարած աշխատանքը թերագնահատելը սխալ կլինի, սակայն Արթուր Ոսկանյանն այն մասնագետն է, ով իր աշխատանքը լավ է կատարում և կարող է նոր շունչ հաղորդել մշտապես մրցանակային հորիզոնականների համար պայքարող «Բանանցին»:

Panorama.am-ի թղթակցի հետ զրույցում Արթուր Ոսկանյանը խոսեց այն խնդիրների մասին, որոնք դրված են թիմի առաջ և շեշտեց, որ ինքը պատրաստ է ընդունել նոր մարտահրավերը:

Արթուր Ոսկանյան.-  Ես իմ աշխատանքը մշտապես սիրով եմ կատարում: Շատ կապված էի «Բանանց-2»-ին: Երկար տարիներ աշխատում էի այդ երեխաների հետ և շատ էի ուզում արդյունքի հասնել: Բայց եղավ այս առաջարկը, որին, անկեղծ ասած, չէի սպասում: Շատ դժվար էր նրանցից բաժանվելը, բայց հասկանում եմ, որ «Բանանցը» գլխավորելն ինձ համար նոր մարտահրավեր է: Իհարկե, ավելի դժվար կլինի, պատասխանատվությունն ավելի մեծ, բայց ես չեմ վախենում և գիտեմ, որ ցանկացած աշխատանք կատարելիս միշտ պետք է ձգտես ավելիին: Յուրաքանչյուր զինվոր երազում է գեներալ դառնալու մասին:

Panorama.am.- Արթուր, Հայաստանի Բարձրագույն խմբի առաջնության դեռևս 8-րդ տուրն է կայացել և «Բանանցը» 12 միավորով 3-րդ հորիզոնականում է: Կարծում ենք, դեռ վաղ էր խոսել արդյունքների մասին: Ի՞նչը Տիտո Ռամալյոյի հարցում չստացվեց և չգոհացրեց ակումբի ղեկավարությանը:

Արթուր Ոսկանյան.- Դժվար է ասել, ինչը չստացվեց, քանի որ յուրաքանչյուր մարզիչ ունի իր փիլիսոփայությունն ու խաղաոճը: Ակումբի ղեկավարությունը նրա առաջ խնդիրներ էր դրել, որը, կարծում եմ, նա չի կատարել: Հիմա նույն առաջադրանքներն իմ առաջ են դրված: Պետք է կարողանամ իմ փիլիսոփայությունն ու խաղաոճը հրամցնեմ «Բանանցի» ֆուտբոլիստներին: Իմ փիլիսոփայությունը թիմային ֆուտբոլն է:

Panorama.am.- Եթե գաղտնիք չէ, ի՞նչ խնդիրներ են դրված «Բանանցի» առաջ:
Արթուր Ոսկանյան.- «Բանանցն», առաջին հերթին, ունի ամենալավ պայմաններն ու ամենաուժեղ ֆուտբոլիստները: Թիմում հանդես են գալիս մեծ թվով լեգեոներներ: Բնականաբար, պահանջները ևս մեծ են և պետք է պայքարել մրցանակային տեղերի համար և ցույց տալ գեղեցիկ ֆուտբոլ: Հիմա պահանջն այն է, որ «Բանանցը» գեղեցիկ ֆուտբոլ խաղա` ավելի քիչ լեգեոներներով և միշտ լինի առաջատարի դերում:

Panorama.am.- Թիմում սպասվո՞ւմ են փոփոխություններ:

Արթուր Ոսկանյան.- Ոչ: Միայն մարզչական առումով կլինեն փոփոխություններ «Բանանցում» և «Բանանց-2»-ում: Այս 2 թիմերը մշտապես պետք է համագործակցեն, քանի որ գլխավոր թիմին ֆուտբոլիստներ մատակարարողը հենց «Բանանց-2»-ն է: «Բանանցում» ինձ կօգնի հենց դուստր թիմի մարզչական կազմը:

Panorama.am.- Հոկտեմբերի 8-ին և 11-ին Հայաստանի ազգային հավաքականն աշխարհի 2018 թ. առաջնության ընտրական փուլում ուժերը կչափի Ռումինիայի և Լեհաստանի հավաքականների հետ: «Բանանցից» մեր ընտրանուն կօգնի միայն մեկ ֆուտբոլիստ` Զավեն Բադոյանը: Ինչո՞ւ:

Արթուր Ոսկանյան.- Դա Ձեր նախորդ հարցի պատասխանն է` կապված թիմի առջև դրված խնդիրների հետ: Այո, «Բանանցից» պահանջները մեծ են և այդ հարցը շոշափվել է, թե ինչո՞ւ մեր թիմի ֆուտբոլիստները չեն հրավիրվում ազգային հավաքական: Մենք ունենք մեծ թվով երիտասարդ ու տաղանդավոր ֆուտբոլիստներ: Հարկավոր է նրանց «Բանանցում» հանդես գալու հնարավորություն ընձեռել, որպեսզի հետագայում նրանք համալրեն ազգային և երիտասարդական հավաքականները:

Panorama.am.- Ի՞նչ կանխատեսումներ ունես հավաքականի առաջիկա խաղերի հետ կապված:

Արթուր Ոսկանյան.- Բոլորս էլ հասկանում ենք, որ դժվար կլինի, քանի որ, ընդհանուր առմամբ, մեր վերջին 2 տարիների առաջատարները չեն խաղալու: Բայց մի կողմից էլ սա լավ հնարավորություն է մյուս ֆուտբոլիստների համար, ովքեր կարող են իրենց ունակությունները ցույց տալ: Հավաքականում հանդես եկող ֆուտբոլիստը պետք է անմնացորդ նվիրվի և, իմ կարծիքով, բոլոր հրավիրված խաղացողներն այնպես կանեն, որ արժանապատվորեն դուրս գան ստեղծված իրավիճակից: Հայաստանի ազգային հավաքականին առաջիկա խաղերին կմաղթեմ միմիայն հաղթանակ:

Հավելենք, որ Արթուր Ոսկանյանը Հայաստանի բազմակի չեմպիոն է, գավաթակիր, սուպերգավաթակիր: Նրա նվաճումների մասին կարելի է երկար խոսել: Հուսանք, որ երիտասարդ մասնագետը կարդարացնի սպասելիքները և մարզչական գործունեությամբ նույնպես կունենա այն հաջողությունները, որը գրանցել է որպես ֆուտբոլիստ: