Անհրաժեշտ է «Նաիրիտ»-ի վերագործարկման պետական քաղաքականություն. Մ.Շահգելդյան

Տնտեսություն 18:04 04/10/2016 Հայաստան

Հայաստանում բազմիցս խոսվել է տնտեսության, գիտատար արդյունաբերության զարգացման, արտադրական ձեռնարկությունների վերականգնման մասին, սակայն սրան հակառակ՝ երբեմնի արդյունավետ աշխատող հսկա ձեռնարկությունները ոչնչացված վիճակում են,- Ազգային ժողովում հայտարարությունների ժամին ասաց «Օրինաց երկիր» խմբակցության անդամ Մհեր Շահգելդյանը:

Նրա խոսքով՝ «Նաիրիտ»-ի հիմնախնդիրը և արդյունաբերության վերականգնման հիմնախնդիր է, և սոցիալական արդարության լակմուսի թուղթ Հայաստանի սոցիալ- տնտեսական քաղաքականության համար:

«Երկար տարիներ այս գործարանի աշխատակիցները պայքարում էին իրենց աշխատավարձերի համար, այսօր պայքարում են միաժամանակ նաև քիմիական հսկան վերագործարկելու համար: Անհրաժեշտ է «Նաիրիտ»-ի վերագործարկման պետական քաղաքականություն, որը պետք է ունենա երեք ռազմավարական կետ՝ ներդրողների ներգրավման համար տրամադրել հարկային արտոնություններ, ձևավորել ներդրումային ռիսկերի ապահովագրման պետական համակարգ, ձևավորել «Նաիրիտ»-ի արտադրանքի արտահանման պետական աջակցության մեխանիզմ: Սա ֆինանսներ չի պահաջում, զուտ կազմակերպչական աշխատանք»,- նշեց պատգամավորը:

Մ. Շահգելդյանն ասաց, որ գործարանի աշխատակիցների հետ մշակել են օրենքի նախագիծ և դրել շրջանառության մեջ, որը հնարավորություն կտա հարկային արտոնություններ տրամադրել «Նաիրիտ»-ին, խրախուսել ներդրողներին:

«Չնայած 35 օր է շրջանառության մեջ է, բայց գործադրից որևէ արձագանք չկա, ինչը ևս մեկ անգամ ցույց է տալիս կառավարության վերաբերմունքը նման կարևոր խնդրին»,- ընդգծեց նա:

Մանրամասները՝ տեսանյութում:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: