Ձեր վստահելի աղբյուրը

«Գյուղատնտեսության ոլորտում մենք ունենք մի իրավիճակ, երբ դժգոհ են բոլորը` թե գյուղացին, թե վերամշակողը, իսկ սա նշանակում է, որ սուբսիդավորման ծրագրերը սխալ են աշխատում»:

Նման հայտարարությամբ է  հանդես եկել  գյուղատնտեսության նախարար Իգնատի Առաքելյանն այսօր կայացած խորհրդակցության ժամանակ: Այն նպատակ ուներ գյուղատնտեսության առաջիկա և հեռանակարային զարգացման ծրագրային հիմնադրույթները:

«Գյուղատնտեսության ոլորտում պետությունն իրականացնում է մի շարք ծրագրեր, որոնք թեպետ որոշակի արդյունքներ տվել են, սակայն այսօր բավարար չեն: Անհրաժեշտ է վերանայել մոտեցումները, օպտիմիզացնել դրանց իրականացման մեթոդները, որպեսզի «արտադրությունից մինչև շուկա» շղթայում ներգրավված բոլոր սուբյեկտները շահույթով աշխատեն: Գյուղացին և վերամշակողն իրենց խնդիրների բեռով ամեն օր թակում են նախարարության դուռը, և մենք պետք է ստեղծենք ռեալ գործիքակազմ` նրանց օգնության ձեռք մեկնելու համար»,- նշել է նախարարը:

ԳՆ հասարակայնության հետ կապերի վարչության փոխանցմամբ,  անհրաժեշտ է ստեղծել պետական երաշխիքով գործող հիմնադրամ, որի միջոցով հնարավոր կլինի լուծումներ տալ գյուղատնտեսական ապրանքների արտադրման, վերամշակման և իրացման խնդիրներին, առավել մատչելի պայմաններով վարկավորում ապահովել գյուղոլորտի համար: Հիմնադրամը կունենա նաև գյուղատնտեսական միավորումների կողմից ավել արտադրված և չիրացված արտադրանքի պետական երաշխիքով գնման և իրացման ֆինանսավորման գործառույթ, որը թույլ կտա արտադրող տնտեսություններին սպառել իրենց ավելցուկ արտադրանքը և ապահովել ֆինանսական կայունությունը:

Խորհրդակցության ընթացքում հանձնարարվել է նախարարի տեղակալներին ստեղծել աշխատանքային խմբեր, որոնք կզբաղվեն մարզային զարգացման 5 տարվա ծրագրերի մշակմամբ գյուղատնտեսության ոլորտին առնչվող խնդիրների մասով, գյուղատնտեսական զարգացման ուղղությունները պետք է նախագծվեն ելնելով տվյալ մարզի առանձնահատկություններից:

Անդրադառնալով կոոպերատիվների ստեղծման խնդիրներին` Իգնատի Առաքելյանն ընդգծել է, որ պետք է լրացնել այն օրենսդրական բացերը, որոնք խանգարում են գյուղացիական տնտեսություններին միավորվել, լրացուցիչ խթաններ ստեղծել, այդ թվում` պետական աջակցություն ցուցաբերել ներդրումների տեսքով, որպեսզի գյուղացին կարողանան ինքը դառնալ գյուղմթերքի վերամշակողը, ինչպես նաև իրացման կազմակերպման հնարավորություններ ունենա:

Նախարարը հավելել է, որ միջինացված հաշվարկով գյուղատնտեսության զարգացմանն ուղղված սուբսիդավորման ծավալը պետք է լինի ընդհանուր արտադրված գյուղմթերքի ծավալի 10 - 15%-ը, որպեսզի կարողանանք այս ոլորտում ռեալ աճ և զարգացում արձանագրել, ուստի անհրաժեշտ է միջոցներ ձեռնարկել ոլորտի լրացուցիչ ֆինանսավորման աղբյուրներ գտնելու ուղղությամբ: