Ձեր վստահելի աղբյուրը

Հռոմի Պապ Ֆրանցիսկոսը այսօր առավոտյան այցելել է կենտրոնական Իտալիայում օգոստոսի 24-ի գիշերը տեղի ունեցած հզոր երկրաշարժի էպիկենտրոնին մերձակա՝ Ամատրիչե քաղաք: Լուրը գրում է «Ռիա նովոստի»-ն՝ հղում անելով Reuters-ին:

Սուրբ գահի մամուլի ծառայությունից հաղորդել են, որ Պապը Ամատրիչե է ժամանել տեղի ժամանակով առավոտյան ժամը 9:10-ին` քաղաքի եպիսկոպոս Ռիեթի Դոմենիկո Պոմիլիի ուղեկցությամբ: Անվտանգության նկատառումներով նրա այցի մասին նախօրոք չի հաղորդվել:

Այցի սկզբում Ֆրանցիսկոս Պապն այցելել է Ամատրիչեի քաղաքային դպրոց, որտեղ հանդիպել է աշակերտների և ուսուցիչների հետ:

«Ես ձեզ հետ եմ, ես աղոթում եմ ձեզ համար»,- ասել է Հռոմի պապը:

Սպասվում է, որ շուտով նա կուղևորվի, այսպես կոչված, «կարմիր գոտի», որն առավել շատ է ավերվել աղետից:

Իտալիայի կենտրոնում տեղի ունեցած 6,0 մագնիտուդ ուժգնությամբ երկրաշարժի զոհ է դարձել 298 մարդ, մի քանի հարյուրը ստացել է վնասվածքներ, ավելի քան 3000 մարդ մնացել է առանց տանիքի:

Լուսանկարները՝  Reuters-ից: