Ձեր վստահելի աղբյուրը

Ազգային ժողովի նիստում 78 կողմ, 19 դեմ ձայներով երրորդ ընթերցմամբ և ամբողջությամբ ընդունվեց  կառավարության կողմից ներկայացված «Հայաստանի Հանրապետության Հարկային օրենսգրքի» նախագիծը:

Նախքան քվեարկությունը պատգամավոր Հրանտ Բագրատյանն ասաց. «Մենք փորձեցիքն այդ պատը ծակել: Օրենսգիրքը չի համապատասխանում Հայաստանի  զարգացման պահանջներին, ոչ մի բան չի ստացվում փոխել, առնվազն երկու հակասահմանադրական դրույթ է պարունակում: Մեկն այն, որ կանխավճար է պահանջում մարդուց, երբ որ ինքը փող չի աշխատել, երկրորդ՝ Սահմանադրության 17-րդ հոդվածով ասվում է, որ պետությունն ապահովում է կրոնական կազմակերպությունների ազատությունը: Մենք ունենք կաթոլիկ հայեր, բողոքականներ, ուղղափառներ,  ստացվում է կաթոլիկ  հայերի եկեղեցին հարկվում է, Հայ առաքելականը չի հարկվում, Սահմանադրության կոպիտ խախտում է»:

ՀՀԿ-ական պատգամավոր Վարդան Այվազյանն ասաց, որ օրենսգրքի մի քանի դրույթ, մասնավորապես ակցիզային հարկը, ուժի մեջ է մտնում մյուս տարի, հիմնական դրույթները՝ 2018 թվականից, գյուղատնտեսության հարկումը նախատեսված է մինչև 2025 թվականից:

Պատգամավոր Էդմոն Մարուքյանը նշեց, որ տասը էջից ավելի առաջարկներ է ներկայացրել, 90 տոկոսը չի ընդունվել:

«Իմ  հայտարարությունը Հարկային օրենսգրքի հետ կապված ուժի մեջ է  մնում, գտնում եմ, որ Հայաստանի տնտեսության համար լուրջ վտանգ է: Այն տեղեկատվությունը, որ Հայաստանն իր վարկային պարտավորությունները չի կարողանալու կատարել մոտ 1,5 տարի հետո, այդ Հարկային օրենսգիրքն այդ խնդիրն էլ չի լուծելու: Բազմաթիվ խնդիրներ են առաջանալու, դրա հետ կապված այլ ակցիաներ կլինեն: Ես դեմ եմ քվեարկելու»,- հայտարարեց պատգամավորը:

ԲՀԿ-ական Միքայել Մելքումյանի խոսքով՝ Հարկային օրենսգիրքը հստակ նահանջ է փոքր և միջին բիզնեսի համար:

«Շեմն իջեցնել և նորից գալ երեք տարվա վաղեմության շեմին, թե ինչ է պետությունը չի կարողանում շրջանառություն ֆիքսել, սա անընդունելի է: Ընդամենը  երկու տարի հետո միջին եկամուտներ ստացող բոլոր աշխատողների հարկային բեռն ավելացնում ենք: Այլ խնդիրներ կան, որոնց ձեռքը կրակն ենք ընկնելու: 8-10 տարվա համար է Հարկային օրենսգիրքը:

«Բարգավաճ Հայաստանի» կուսակացականները  խմբակցության չեն մասնակցի քվեարկությանը»,- ասաց նա:

Անկախ պատգամավոր  Խաչատուր Քոքոբելյանն ասաց, որ այս Հարկային օրենսգիրքն ավելացնում է հարկատուների բեռը, այդ թվում նաև աշխատավարձի մասով:

«Այդ իսկ պատճառով մենք դեմ ենք եղել: Կան նաև խմբագրական լուրջ, կարևոր բաներ: Առաջարկում եմ գոնե հետաձգել մի քանի օր, որ առնվազն  գործիքակազմը հստակեցվի: Խոսքը վերաբերում է  ստուգումներին, որտեղ հստակություն չկա, թե ինչպիսի գործիքներ են աշխատելու: Դա ամենաշատ և ամենամեծ խոչընդոտն է մեր գործարարների համար»,- նշեց նա:

ՀԱԿ խմբակցության ղեկավար Լևոն Զուրաբյանն ասաց, որ Հարկային օրենսգրքի քննարկումը չի համապատասխանել ժողովրդավարական քննարկման նորմերին, թեև պայմանավորվածություն է եղել  հրավիրել նաև իրենց փորձագետներին, սակայն երբեք չեն հրավիրել:

«Օրենքը  բերվել է հապշտապ կարգով: Նոր կառավարությանը նշանակումը, որը դեռ չի ներկայացրել իր ծրագիրը,  նույնպես որևէ կերպ չի անդրադարձել այդ օրենքի քննարկման վրա, ինչը նշանակում է, որ նորանաշանակ վարչապետն իր թիմով նույն դիրքորոշումը, մոտեցումն ունեն  օրենքների քննարկման վերաբերյալ, համակարգը գործում է  անկախ նրանց, թե ով է վարչապետ, կառավարություն: Սա ևս մեկ անգամ ցույց է տալիս, որ գործ ունենք նույն կոռումպացված համակարգի հետ: Դեմ ենք քվեարկելու  այս նախածին»,- ասաց Լևոն Զուրաբյանը:

Վարդան Այվազյանն ասաց, որ 25 քննարկում է եղել և Հարկային օրենսգիրը պատրաստ է ընդունման:
 

Մանրամասները՝ տեսանյութում: