Ձեր վստահելի աղբյուրը

Ազգային ժողովում քննարկվում է Կենտրոնական ընտրական հանձնաժողովի նախագահի ընտրության հարցը: ԱԺ նախագահ Գալուստ Սահակյանն ասաց, որ ԱԺ պետաիրավական հարցերի մշտական հանձնաժողովը  ԿԸՀ նախագահի պաշտոնում առաջարկել է Տիգրան Մուկուչյանի թեկնածությունը:

Պետաիրավական հարցերի մշտական հանձնաժողովի նախագահ Հովհաննես Սահակյանն ասաց, որ Սահմանադրական փոփոխություններով այլևս ԿԸՀ նախագահին և ԿԸՀ անդամներին պետք է ընտրի Ազգային ժողովը:

ԿԸՀ գործող նախագահ Տիգրան Մուկուչյանն իր ելույթում ասաց, որ ԿԸՀ-ն կազմավորվում է ընտրական գործընթացների առումով բավականին ծանրաբեռնված ժամանակահատվում: Նախ ընդունվեց նոր Ընտրական օրենսգիրքը, որը պարունակում է  բազմաթիվ նոր իրավակարգավորումներ, ընտրական գործընթացի կազմակերպման առումով  ամրագրվել են նորովի մոտեցումներ, որոնք էլ պահանջում են աշխատանքի կազմակերպման նոր մեթոդներ:

Ըստ Տ. Մուկուչյանի, նոր ԸՕ-ն նախատեսվում է մոտ 5 տասնյակ նոր որոշումների ընդունում իրավահարաբերությունների լիարժեք և ամբողջական կանոնակարգում իրականացնելու համար:

«Ակնհայտ է, որ թերևս թիվ մեկ խնդիրն ընտրական գործընթացի նկատմամբ հանրային վստահության բարձրացումն է»,- ընդգծեց նա՝ թվարկելով այն քայլերը, որոնք պետք է նպաստեն վստահության բարձրացմանը: 

Տ. Մուկուչյանի խոսքով՝  ընտրական գործընթացներում նոր տեխնիկական միջոցների կիրառելիությունն ապահովելու համար պետք է ապահովել համապատասխան քանակով մասնագետների ընտրությունն ու վերապատրաստման կազմակերպումը:

«Նշված մասնագետների ընտրության հարցում միակ ուղղորդիչ սկզբունքը պետք է լինի նրանց արհեստավարաժությունը, անկողմնակալությունը, գիտելիքն ու բանիմացությունը: Նման կադրերի ընտրության հարցում անգնահատելի կլինի քաղաքական կուսակցությունների, հասարակական կազմակերպությունների  աջակցությունը»,- ասաց ԿԸՀ նախագահի թեկածուն: