Ձեր վստահելի աղբյուրը

Լեհաստանում շուրջ 100 հազար մարդ է  մասնակցել հղիության արհեստական ընդհատման մասին օրենսդրության խստացման դեմ բողոքի ակցիային։ Երկրի ոստիկանությունը հայտարարել է, որ Լեհաստանի տարածքում տեղի են ունեցել շուրջ 143 բողոքի հավաքներ, որոնցից ամենազանգվածայինը եղել է Վրոցլավում և որին մասնակցել է 20 հազար մարդ։

Իսկ մայրաքաղաք Վարշավայում, ըստ ոստիկանության տվյալների, մասնակցել է 17 հազար մարդ։

«РИА Новости»-ի փոխանցմամբ, երկրի ոստիկանության գլխավոր հրամանատար Յարոսլավ Շիմչիկը հայտարարել է, որ ակցիայի ժամանակ յոթ միջադեպ է արձանագրվել, երբ մասնակիցների վրա փորձել են ձվեր նետել։ Ոստիկանությունը ձերբակալել է չորս քաղաքացիների։

Լրատվամիջոցը հիշեցնում է, որ նախորդ շաբաթ Լեհաստանի Ազգային ժողովը լրամշակման է ուղարկել օրինագիծը, որը սահմանում է պատժաչափ և քրեական պատասխանատվություն հղիության արհեստական ընդհատման դիմած կանանց ու բժիշկների համար։ Այդ օրինագծով պտուղը որակվել է որպես «բեղմնավորված երեխա», իսկ «աբորտը»՝ «նախածննդյան սպանություն»։

Այժմ, ըստ աղբյուրի, Լեհաստանում գործում է 1993-ին ընդունված օրենքը, որի համաձայն աբորտները արգելվում են, բացառությամբ մի քանի դեպքերի, օրինակ՝ հղիության արհեստական ընդհատումը թույլատրվում է ծննդկանի կյանքին սպառնացող վտանգի, պտղի որոշ պաթոոգիաների ու բռնաբարության դեպքերում։