Ձեր վստահելի աղբյուրը

Այս պահին «Երևան ՋԷԿ»-ի  պարտքը «Գազպրոմ-Արմենիա» ՓԲԸ-ին կազմում է  35 միլիոն դոլար:  Հուլիսի 1-ի դրությամբ պարտքը կազմել էր 52,3 միլիոն դոլար, այսինքն՝ արդեն 17 միլիոն 300 հազար դոլար մարվել է,- Ազգային ժողովում կառավարության հետ հարցուպատասխանի ժամանակ ասաց էներգետիկ  ենթակառուցվածքների և բնական պաշարների նախարար Աշոտ Մանուկյանը՝ պատասխանելով պատգամավոր Խաչատուր Քոքոբելյանի հարցին, թե ինչքա՞ն է կազմում «Երևան-ՋԷԿ»-ի պարտքը «Գազպրոմ-Արմենիա» ընկերությանը, ինչպե՞ս է մարվելու այդ գումարը և ինչի՞ց է առաջացել պարտքը:

Ըստ նախարարի ներկայացման՝ պարտքն առաջացել է օգտագործված բնական գազի դիմաց չվճարումների արդյունքում:

Ա.Մանուկյանն ընդգծեց, որ երբևէ կառավարությունը չի քննարկել, չի քննարկում, առաջիկայում չի քննարկելու «Երևան-ՋԷԿ»-ի օտարման հարցն որևէ պարտքի դիմաց:

««Գազպրոմ-Արմենիա»-ի հետ ընթացել են քննարկումները, շարունակվում են քննարկումները գույքով նշված գումարը փակելու ընդամենը հնարավորության վերաբերյալ»,- ասաց նախարարը:

Ի՞նչ գույքի մասին է խոսքը:

Ա.Մանուկյանի խոսքով՝ 1990-ական թվականների կեսերին կառուցվել էին համայնքային նշանակության գազաբաշխիչ ցանցեր, խողովակներ, որոնք մնացին մինչև 2000-ականների կեսերը: Այնուհետև, ըստ նախարարի, այդ ցանցերը, խողովակները հանձնվել էին էներգետիկայի նախարարության հաշվեկշիռ, ապա տեղափոխվել «Երևան-ՋԷԿ»-ի հաշվեկշիռ:

«Հենց այդ գազաբաշխիչ ցանցերի ու խողովակների մասին է խոսքը»,-  հավելեց Ա.Մանուկյանը: