Ձեր վստահելի աղբյուրը

Քաղաքական գործիչ Անդրիաս Ղուկասյանին առաջադրված մեղադրանքը՝ զանգվածային անկարգություններ կազմակերպել, դատարանի կողմից հաստատվելու պարագայում նրան սպառնում է 4-ից 10 տարվա ազատազրկում: Այդ մասին այսօր լրագրողների հետ հանդիպմանը հայտարարեց Ղուկասյանի փաստաբան Կարեն Մեժլումյանը՝ մեղադրանքը որակելով «աբսուրդ»:

«Անդրիաս Ղուկասյանին մեղադրում են այն բանի համար, որ Ղուկասյանը, Դավիթ Սանասարյանը և Արմեն Մարտիրոսյանը Ազատության հրապարակում կազմակերպել են զանգվածային անկարգություն, նրանց առաջնորդությամբ այդ անկարգությունները գնացել-հասել են Խորենացի փողոց, որտեղ էլ ժողովրդին հրահանգել են քարեր ու այլ առարկաներ վերցնել և հարվածել ոստիկաններին: Բնականաբար նման բան տեղի չի ունեցել», -հայտարարեց Մեժլումյանը:

Իրավիճակը և նախաքննության ընթացքում քրեական գործի զարգացումը փաստաբանին հիմք են տվել եզրակացրել՝ «Անդրիաս Ղուկասյանը քաղբանտարկյալ է»:

Փաստաբանի պնդմամբ, նախաքննական նյութերում Անդրիաս Ղուկասյանի դեմ ցուցմունք տվել են միայն ոստիկանները և այն, ինչ ասվել է նրա դեմ, դա արել են ոստիկանները:

«Մենք փաստաբանական հարցման ենք ենթարկել այդ օրվա իրադարձությունները լուսաբանող լրագրողներին, բոլորին և նրանք ասել են, որ Անդրիաս Ղուկասյանը և մյուս բանախոսները, բոլորը խոսել են խաղաղ երթի, խաղաղ միջոցառման մասին: Ավելին, Սարի թաղում մարդիկ ասել են, որ Անդրիաս Ղուկասյանը և մյուսները ձեռքները պահել են ու ասել ժողովրդին՝ սադրիչներ են, հանկարծ չտրվեք սադրանքների: Այսինքն՝ ամբողջությամբ հակառակ պատկերն են ներկայացրել: Այց բացատրությունները ներկայացրել ենք քննչական մարմին, որպեսզի նրանցից ցուցմունք վերցնեն: Այսինքն, որոշեցինք ակտիվ պաշտպանություն իրականացնել», -հայտարարեց Մեժլումյանը:

Փաստաբանի խոսքով, Անդրիաս Ղուկասյանի «քաղբանտարկյալ» լինելը «իր կնիքով» հաստատել է Վերաքննիչ քրեական դատարանը ու բացատրեց՝ ինչպես.

«Դատարանը Անդրիաս Ղուկասյանին հարց է ուղղել, թե եթե գրավ կիրառվի և նա ազատ արձակվի, արդյոք շարունակելո՞ւ է  իր ընդդիմադիր գործունեությունը, և Անդրիաս Ղուկասյանը պատասխանել է, որ ինքը քաղաքական գործիչ է, այո, ինքը իր գործունեությունը շարունակելու է և իր ընդդիմադիր կեցվածքում որևէ փոփոխություն չի լինելու: Դատարանը որոշում է կայացնում և նշում, որ կալանքը չի կարող երաշխիք հանդիսանալ, որ ինքը չի խոչընդոտի գործի քննությանը այն պատճառով, որ նա նշեց, թե իր քաղաքական գործունեությունը շարունակելու է: Այսինքն՝ դատարանը իր առաջադրած հարցով ու պատասխանով ֆիքսեց, որ  Անդրիաս Ղուկասյանին որպես ընդդիմադիր գործիչ են պահում կալանքի տակ»:

Խափանման միջոց կալանքը փոխելու միջնորդությունները, ըստ փաստաբանի, «Ֆլետչեր ավարտած» դատավորը մերժել է առանց հիմքերի՝ հաշվի առնելով միայն նախաքննական մարմնի ներկայացրած ոստիկանների ցուցմունքները:

«Ֆլետչեր ավարտած դատավորը հաշվի չառավ մեր ներկայացրած տեսանյութը, որտեղ երևում էր՝ ինչպես է Սարի թաղում Անդրիաս Ղուկասյանը հայտարարում, որ պետք է ամեն ինչ խաղաղ լինի ու ոչ մի շենք գրավելու մասին խոսք չկա», -ներկայացրեց փաստաբան Մեժլումյանը: