Ձեր վստահելի աղբյուրը

Տավուշում լույս աշխարհ եկած հսկա նորածնի հայրը Ռուսաստանից մեքենայով ճանապարհ է ընկել, վաղը Ազատամուտ կհասնի, որդու դուրսգրմանն ինքն էլ ներկա կլինի, հետո նորից արտագնա աշխատանքի կմեկնի:

Աչաջուրի առողջության կենտրոնում ծնված 5 կգ  230 գրամ է քաշով ու  57 սմ հասակով տղային  Տիգրան են կոչել:

Երեխայի տատը՝ Գալյա Եգանյանը,  Panorama.am-ի հետ զրույցում ասաց, որ դուստրն ու թոռն իրենց լավ են զգում, քիչ առաջ է տեսել, ամեն բան կարգին է:

«Էրեխեն լավ, ինքը՝ լավ: Երեխայի հայրն էլ է մեծ քաշով ծնվել, ասում են՝ 5 կիլո է եղել»,-ասաց տատը:

Կոնսուլտացիայի ընթացքում բժիշկները կասկածում էին, որ զույգ երեխաներ են ծնվելու:
«Փորը շատ մեծ էր, էխո արեցին, կասկածեցին: Բժիշկները շատ զարմացած են, վաաայ, հիացած: Նման բան ոչ տեսած են, ոչ էլ լսած»,-ուրախացած ներկայացրեց տատը:

Ընտանիքում Տիգրանը երկրորդ երեխան է, նրա ավագ եղբայրը՝ Վահեն լույս աշխարհ է եկել 3 կգ 900 գ քաշով:

Հղի կինը սնվելու հետ կապված գաղտնիքներ չունի:

«Մենք իրա համար եփել ենք, թափել, ամեն բան էլ կերել է»,-ասաց տատը: