Ձեր վստահելի աղբյուրը

«Չորրորդ իշխանություն»-ը գրել է. «Երեկ կրկին հրթիռակոծվել է Հալեպի հայաշատ Նոր Գյուղ թաղամասը։  Հրթիռակոծությունից զոհվել են  1986թ. Ծնված  Գասպար Շատոյանը և 1987 թ.  Ծնված  Մովսես Մովսիսյանը։  Վիրավորվել է Վարուժան Տոնապետյանը։  Սփյուռքի հայկական լրատվամիջոցների փոխանցմամբ՝  զոհերը հայկական թաղամասերը պաշտպանող հայորդիներ էին։

Հիշեցնենք, որ  սեպտեմբերի 30-ից սկսած ահաբեկիչները ռմբակոծության տակ են պահում Սիրիայի  հայաբնակ  թաղամասերը։  Այս մի քանի օրերի ընթացքում  հայերի շրջանում զոհերի թիվը հասել է 7-ի։  Վիրավորների ու ծանր վիրավորների թվերը  մի քանի տասնյակ են։ 

Եվ չնայած սրան՝  Հալեպում հրթիռակոծությունների թիրախում հայտնված  հայերի տարհանման հարց Հայաստանի  կառավարությունը չի քննարկում։  Հայաստանը բավարարվել է երկու ինքնաթիռ  մարդասիրական օգնություն առաքելով Սիրիա:

Երեկ վիրտուալ հարթակում բազմաթիվ հանրային հայտնի դեմքեր պահանջում էին իշխանություններից  անհապաղ կազմակերպել  հայերի տարհանումը  հրթիռակոծվող թաղամասերից։  Չնայած այս ամենին՝  ՀՀ կառավարությունն ու  արտգործնախարարությունը երեկվա դրությամբ լուռ էին»։