Ձեր վստահելի աղբյուրը

Պետական մարմինների կողմից մատուցվող ծառայությունների որակի և արդյունավետության բարելավման  խնդիրը կառավարության համար համարվում է գերակայություն: Այս մասին այսօր կառավարության նիստում նշեց  ՀՀ վարչապետ Կարեն Կարապետյանը:

Վարչապետի խոսքերով՝ որոշակի ուսումնասիրություններ են կատարել և, ելնելով դրանից, հնչեցրեց հերթական հանձնարարականը. «Կարծում եմ՝ ակտուալ է հետևյալ հանձնարարականը: Հանձնարարում եմ՝  ընդունել ի գիտություն, որ պետական մարմինների կողմից մատուցվող ծառայությունների որակի և արդյունավետության բարելավման խնդիրը կառավարության համար համարվում է գերակայություն, և օրենսդրական նախագծերի տեսքով ներկայացվող նոր կարգավորումներում հաշվի առնել այս հանգամանքը»:

Երկրորդ, ըստ Կարեն Կարապետյանի, բնակչությանն այս ծառայությունները թե ժամանակի, թե տարածության, թե որակի առումով հնարավորինս  մատչելի դարձնելու նպատակով պետք է ուսումնասիրել և արդարադատության նախարարություն ներկայացնել գերատեսչությունների կողմից մատուցվող ծառայությունների ցանկը՝ նկարագրելով յուրաքանչյուր ծառայության մատուցման գործընթացը և պահանջվող փաստաթղթերը:

Այնուհետև վարչապետը հանձնարարեց արդարադատության նախարարին՝ ամփոփել պետական մարմինների կողմից ներկայացված տեղեկատվությունը և կառավարության աշխատակազմ ներկայացնել առաջարկություն:

«Որպես այլընտրանքային լուծում՝ առաջարկում եմ դիտարկել նաև որոշակի գործառույթներ մասնավոր հատվածին պատվիրակելու հնարավորությունը»,- ասաց նա:

Կարեն Կարապետյանը Կառավարության աշխատակազմի ղեկավար-նախարար Դավիթ Հարությունյանին էլ հանձնարարեց՝ նշված խնդիրների լուծման նպատակով երկօրյա ժամկետում ձևակերպել առանձին հանձնարարականներ՝ նշելով կատարման պատասխանատուներին և ժամկետները:

«Մենք պետք է քաղաքացիների համար ստեղծենք առավել բաց, թափանցիկ հրապարակ, որտեղ նրանք պետական ատյաններից կարճ ժամկետում կստանան իրենց պատասխանները»,- ասաց նա:

Նրա խոսքերով՝  պետության կողմից քաղաքացիներին մատուցվող ծառայությունների գործընթացները շատ դեպքերում անհարկի բարդ են և քաղաքացիների համար առաջացնում են ժամանակի և ռեսուրսների զգալի վատնում:

«Գործող համակարգը այնպիսին է, որ որոշակի ծառայություններ ստանալու համար անձը պետք է փաստաթղթեր ներկայացնի մի քանի մարմիններից: Մինչդեռ պետական մարմնի համար անհրաժեշտ տեղեկությունները կարելի է հասանելի դարձնել էլեկտրոնային կառավարման համակարգում, որի կայացման ուղղությամբ բավականին աշխատանքներ արդեն իսկ կատարված են»,- նշեց վարչապետը: