Ձեր վստահելի աղբյուրը

Ազգային ժողովում ավարտվեց Կենտրոնական ընտրական հանձնաժողովի նախագահի ընտրության քվեարկությունը: ԿԸՀ նախագահի միակ թեկնածուն ԿԸՀ գործող նախագահ Տիգրան Մուկուչյանն էր:

Կենտրոնական ընտրական հանձնաժողովի նախագահի ընտրության քվեարկությանը ԱԺ 130 պատգամավորից մասնակցել է 103-ը: Ձայները բաշխվել է հետևյալ կերպ՝ 96 կողմ, 4 դեմ,  3 քվեաթերթիկ ճանաչվել է անվավեր:

Միաժամանակ կատարվել է ԿԸՀ անդամների ընտրության քվեարկությունը, որի արդյունքում  ԿԸՀ անդամի թեկնածուներ Լաուրա Գալստյանը, Նունե Հովհաննիսյանը, Սիլվա Մարկոսյանը, Գեորգի Մարտիրոսյանը, Սեյրան Շահսուվարյանը, Արմեն Սմբատյանն ընտրվել են ԿԸՀ անդամներ:

Նշենք, որ նրանք վերընտրվել են։

ԿԸՀ նախագահ Տիգրան Մուկուչյանը՝ իր և ԿԸՀ  նորընտիր կազմի անդամների անունից շնորհակալություն հայտնեց  վստահության համար։

«Սա այն դեպքն է, որ վստահությունն ավելի շատ ենթադրում է  պատասխանատվություն, քանզի Կենտրոնական ընտրական հանձնաժողովը ձևավորվել է մի ժամանակաշրջանում, երբ ընդունվել է նոր ընտրական օրենսգիրք, առկա է հսկայական անելիք, մի շարք հարցերի վերաբերյալ այսօր առկա են նոր լուծումներ փնտրելու, որոնելու, գտնելու հրամայականը:

Հավաստիացնում եմ, որ ԿԸՀ-ն  միշտ բաց է օբյետիվ քննադատության համար՝  գիտակցելով, որ  ցանկացած օբյեկտիվ քննադատությունն է նպաստում աշխատանքի արդյունավետության բարձրացմանը և կատարելագործմանը, բաց է ցանկացած համագործակցության, առաջարկություններ լսելու, քննարկելու, իրացնելու համար,  հատկապես ակտիվ համագործակացության քաղաքական կուսակցությունների՝ որպես ընտրական գործընթացների ամենաակտիվ մասնակիցների և քաղհասարակության ներկայացուցիչների հետ:

Հավաստիացնում եմ, որ ԿԸՀ գործունեության հիմնական սկզբունքները, որոնցով որ պետք է գործի ԿԸՀ-ն, լինելու են օրինականության, արդարության, ազատության,  ազատ, արդար ընտրություններ կազմակերպելո,ւ  և թափանցիկության, և հրապարակայնության սկզբունքները:  Կարծում եմ՝ հենց այս համատեքստում է հնարավոր կյանքի կոչելու Ընտրական օրենսգրիք նոր կանոնակարգումները»,- իր ելույթում ասաց ԿԸՀ նախագահ Տիգրան Մուկուչյանը: