Ձեր վստահելի աղբյուրը

Աղավնաձորում  նախորդ տարվա մթերած խաղողի դիմաց պարտքերը գրեթե ամբողջովին վճարվել են, մնացել են մի քանի հոգի, որոնց պարտքը մինչև շաբաթվա վերջ կվճարվի: Այս մասին այսօր կառավարությունում լրագրողների հետ զրույցում ասաց ՀՀ գյուղատնտեսության փոխնախարար Ռոբերտ Մակարյանը:

Նշենք, որ մթերված խաղողի գումարները գյուղացիներին չէր վճարել «Վեդի Ալկո» ընկերությունը:
Հարցին, թե ինչպես կարողացավ ընկերությունը վճարել գյուղացիներին, փոխանախարարն ասաց. «Սպիրտ ուներ,  վաճառեց ու պարտքերը մարեց»:

Ռոբերտ Մակարյանը նշեց, որ խաղողի գնման, մթերումների հետ կապված առաջիկայում կլինի համակարգային մոտեցում, որը կներկայացվի հանրությանը:

Ինչ վերաբերում է այս տարի Աղավնաձորում խաղողի մթերմանը, փոխնախարարն ասաց, որ  պայմանավորվածություն կա մթերողների հետ, հիմա պետք է  գյուղացիների հետ մթերման գնի շուրջ պետք է բանակցեն:

«Այսինքն՝ այս տարի խաղողի մթերման խնդիր չի լինի»,- նշեց նա:

Նա տեղեկացրեց, որ այսօրվա դրությամբ հանրապետությունում մթերվել է 90  հազար տոննա  խաղող, մթերման գործընթացը շարունակվում է և խնդիրներ չեն լինի:

«Վճարումների մասով ևս կլինեն նորություններ, այսինքն՝ կաշխատենք, որ վերամշակող ընկեությունները վճարումներն ամենակարճ ժամանակահատվածում ավարտեն»,- ընդգծեց  Ռոբերտ Մակարյանը:

Հարցին, թե ինչ փոխվեց,  որ նախորդ կառավարության ժամանակ չէր ստացվում խնդիրը կարգավորել, գյուղատնտեսության փոխնախարարը պատասխանեց. «Վերամշակող ընկերությունների ֆինանսական վիճակը: Հիմա լուծումներ, մեխանիզմներ են առաջարկվում, որոնք ձեռնտու են վերամշակողներին»:

Իսկ թե խոսքը ինչ լուծումների մասին է, Ռոբերտ Մարկարյանը մեկ անգամ ևս նշեց, որ այժմ ծրագիրը վերանայում են և առաջիկայում այն կներկայացնեն: