Ձեր վստահելի աղբյուրը

ԱԺ ճեպազրույցների ժամանակ ԲՀԿ խմբակցության պատգամավոր Լյովա Խաչատրյանը պատասխանելով հարցին, թե հավատո՞ւմ են կառավարության իրականացրած փոփոխություններին,  նշեց, որ արդեն քսան օր է, կառավարություն է ձևավորվել, սակայն կոնկրետ քայլեր դեռ չեն տեսել՝ բացի անձերի տեղափոխումից:

«2000 տարի առանց տեսնելու հավատացել ենք, բայց հիմա երբ արդյունքները տեսնենք, այդ ժամանակ կտանք գնահատական»,- հավելեց պատգամավորը:

Լրագրողի հարցին, թե ինչո՞ւ կողմ քվեարկեց ԿԸՀ նախագահի թեկնածությանը, արդյոք տեսե՞լ էր նրա գործի արդյունքները, Լյովա Խաչատրյանը պատասխանեց, որ նրա աշխատանքի արդյունքները տեսել է խորհրդարանական ընտրությունների ժամանակ և կողմ է քվեարկել, իսկ ԿԸՀ մնացած անդամների աշխատանքը չի տեսել, դրա համար էլ ձեռնպահ է քվեարկել:

Լյովա Խաչատրյանից լրագրողները  նաև հետաքրքրվեցին, թե արդյոք ԲՀԿ-ականները հանդիպե՞լ են Գագիկ Ծառուկյանի հետ, պատգամավորը նշեց, որ  շատերը Գագիկ Ծառուկյանի հետ ընկերական հարաբերություններ ունեն, նա կուսակցության հիմնադիրն է, և նրա հետ հանդիպումները պետք չէ դարձնել քննարկման առարկա: 

Հարցին, թե այդ հանդիպումների ընթացքում  արդյոք ստորագրություններ են հավաքվում` Գագիկ Ծառուկյանի վերադարձի խնդրանքով, Լյովա Խաչատրյանը նշեց, որ ստորագրություններ չեն հավաքվում, իսկ Ծառուկյանը, ինչպես ՀՀ յուրաքանչյուր քաղաքացի, մտահոգ է իր երկրի ճակատագրով:

Անդրադառնալով մեկ այլ հարցի, թե առաջիկա խորհրդարանական ընտրություններում ԲՀԿ-ն առանց Գագիկ Ծառուկյանի կկարողանա՞ հաղթահարել անհրաժեշտ շեմը, Լյովա Խաչատրյանն ասաց,  որ ՏԻՄ ընտրություններին զգալի հետընթաց կար, բայց Գյումրիում իրենց գրանցած արդյունքը ցույց տվեց, որ իրենք մարտունակ թիմ ունեն և կարծում է, որ կարող են հաջողություն արձանագրել: