«Դարձիր գրադարանի բարեկամ». Գրադարանավարի օրն է

Մշակույթ 10:21 07/10/2016 Հայաստան

Հայաստանի Հանրապետության կառավարության 2004 որոշմամբ հոկտեմբերի 7-ը ՀՀ-ում նշվում է որպես Գրադարանավարի օր:

ՀՀ մշակույթի նախարարությունը Գրադարանավարի օրվա կապակցությամբ իրականացնում է «Դարձիր գրադարանի բարեկամ» խորագիրը կրող ծրագիրը, որը նվիրվում է Հայաստանի Հանրապետության անկախության 25-ամյակին:

Միջոցառումներին իրենց բազմաբովանդակ ծրագրերով մասնակցում են Հայաստանի Հանրապետության շուրջ 200 գրադարաններ: Ծրագրի շրջանակում կանցկացվեն վերջին 25 տարիներին հրատարակված գրքերի ցուցադրություններ, հանդիպումներ մարզերի, համայնքների` գրական ոլորտում ստեղծագործողների հետ: Հոկտեմբերի 7-ին գրադարաններում կամփոփվի սեպտեմբերի 1-ին մեկնարկած` համայնքային և զորամասերի գրադարանների գրքային հավաքածուների համալրման նպատակով իրականացվող նվիրատվության նախաձեռնությունը:

Կանցկացվեն նաև մեծարման ցերեկույթներ` նվիրված վաստակաշատ գրադարանավարներին:
Այս տարի ծրագրին միացել են նաև ԼՂՀ հանրապետական և քաղաքային ութ գրադարաններ:
Արդեն ավանդական դարձած այս ծրագրի նպատակն է ընդգծել գրքի, գիտելիքի, գրադարանների դերը, ընթերցանության կարևորությունն արդի տեխնոլոգիաների ժամանակաշրջանում, ինչպես նաև նպաստել սահմանամերձ համայնքային և զորամասերի գրադարանները գրքային հավաքածուներով համալրելու գործին:

ՀՀ մշակույթի նախարարի հրամանով` գրադարանային ոլորտում ունեցած նշանակալի ավանդի և մշակույթի բնագավառում երկարամյա աշխատանքային գործունեության համար, մարզային և համայնքային գրադարանների մի շարք աշխատակիցներ կպարգևատրվեն նախարարության պարգևներով:

Հարակից հրապարակումներ`

1990 թվականից ﬕնչ օրս Հայաստանում 500 գրադարան է փակվել

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: