Քրիստոֆ Դաում. «Հայաստանի ընտրանին ֆիզիկապես և տակտիկապես լավ պատրաստված է»
Վաղը Հայաստանի ֆուտբոլի ազգային հավաքականն աշխարհի 2018 թ. Առաջնության շրջանակներում ուժերը կչափի Ռումինիայի ազգային թիմի հետ: Հանդիպումից առաջ կայացած նախախաղային մամուլի ասուլիսում սպասվող հանդիպման մասին խոսեցին հյուրերի թիմի գլխավոր մարզիչ Քրիստոֆ Դաումն ու ֆուտբոլիստ Գրիգորե Դռագոշը:
Ռումինացի ֆուտբոլիստը նշեց, որ, բնականաբար, Հենրիխ Մխիթարյանի բացակայությունը Հայաստանի հավաքականի համար լուրջ խնդիր է, սակայն իրենք չէին էլ պատրաստվում կենտրոնանալ առանձին ֆուտբոլիստների վրա:
«Այս խաղում մենք կմտնենք խաղադաշտ հաղթողի հոգեբանությամբ և կփորձենք միավորներ նվաճել: Այսօր բոլոր խաղերն էլ դժվար են: Մխիթարյանի բացակայությունը լուրջ խնդիր է, բայց մենք կենտրոնանալու ենք Հայաստանի հավաքականի ողջ թիմի վրա և ոչ թե առանձին ֆուտբոլիստների: Չեմ համարում, որ մենք ֆավորիտ ենք, Հայաստանի հավաքականը նույնպես ի զորու է հավասար պայքար մղել: Իրականում շատ բան չգիտեմ Ձեր երկրի մասին, բայց մենք ձեռնարկել ենք բոլոր միջոցները՝ վաղը կայանալիք խաղում հաղթանակ տոնելու համար»,- ասաց Դռագոշը:
Ռումինիայի ազգային հավաքականի գլխավոր մարզիչ Քրիտոֆ Դաումի խոսքերով՝ իրենք մարզադաշտ դուրս չեն գալու ֆավորիտի կարգավիճակում, քանի որ Եվրոպայի առաջնությունը ցույց տվեց, որ կարելի է սխալվել:
«Դիտել ենք Հայաստանի հավաքականի մասնակցությամբ ընտրական փուլի Դանիայի հավաքականի հետ հանդիպումը, որը կարող էր ոչ ոքի հաշվով ավարտվել: Հայաստանի ընտրանին ֆիզիկապես և տակտիկապես լավ է պատրաստված: Չեմ կարող ասել, թե վաղը դուրս ենք գալու խաղադաշտ և հարձակվողական ֆուտբոլ ցուցադրենք, քանի որ Հայաստանի հավաքականի հակագրոհները շատ վտանգավոր կարող են լինել: Ամեն ինչ կախված կլինի նրանից, թե ինչպես կընթանա հանդիպումը: Մոտիվացիան նույնն է: Երբ գլխավորում ես հավաքականը, թիմին պատրաստելու համար ունես ընդամենը 3 օր ժամանակ: Այդ մի քանի օրերի ընթացքում թիմի համար գլխավոր մարդը պետք է լինի գլխավոր մարզիչը:
Ինչ վերաբերում է Մխիթարյանին, ապա նա հիանալի ֆուտբոլիստ է: Նրա մասին խոսել եմ Միրչա Լուչեսկուի հետ: Մխիթարյանը միացավ «Շախտյորին», հետո տեղափոխվեց «Բորուսիա», այնուհետև զարգացնելով հաջողությունը՝ տեղափոխվեց «Մանչեսթեր Յունայթեդ»: Ոչ ոք չի վիճարկում, որ նա ֆանտաստիկ ֆուտբոլիստ է»,- ասաց Դաումը:
Լրահոս
Տեսանյութեր
Ուզում են երկիրը Հյուսիսային Կորեա սարքեն, մենք էլ դառնանք իրենց համբալները. Բողոքի ակցիա
