Ձեր վստահելի աղբյուրը

Տարիներ առաջ մարզական լրագրության ասպարեզում գրեթե բացակայում էին գեղեցիկ սեռի ներկայացուցիչները: Հատկապես մարզադաշտերում մթնոլորտն այն չէր և շատերը խուսափում էին մասնագիտական այս ուղին ընտրելու ճանապարհից: Ցանկությունը մարում էր ազգային մենթալիտետի տեսանկյունից և ստադիոններում հավաքված գռեհիկ մասայի ներկայությունից:

Այսօր Հայաստանում պատկերը բոլորովին այլ է: Երկրպագուն սովորել է հարգել մյուսներին, կա երկրպագման արվեստ և հաճելի է բազմաթիվ մարզական միջոցառումների ժամանակ տեսնել բազմաթիվ գեղեցիկ սեռի ներկայացուցիչների, ովքեր սիրով կատարում են իրենց աշխատանքը:

Թող մեզ ներեն մեր հակառակ սեռի ներկայացուցիչ գործընկերները, սակայն այսօր Panorama.am-ը զրուցել է մարզական լրագրողուհիների հետ, ովքեր հայտնել են իրենց կարծիքն աշխարհի 2018 թ. ընտրական փուլի Հայաստան-Ռումինիա և Լեհաստան-Հայաստան հանդիպումների մասին:

Վարվառա Հայրապետյան, Արմենպրես լրատվական գործակալություն.- Ռումինիայի հետ Հայաստանի հավաքականին հեշտ խաղ չի սպասվում,սակայն վստահ եմ` տղաները կռվելու են յուրաքանչյուր գնդակի համար։ Հավաքականի ավագը չկա, ինչը փոխում է ամբողջ ընտրանու տեսքը: Հայաստանի հավաքականն այլ խաղամակարդակ ունի Մխիթարյանի ներկայության և բացակայության ժամանակ։ Իրատես լինելով՝ դժվար կլինի հաղթել Ռումինիային, սակայն միավոր կորզել կարող ենք։ Ինձ մնում է միայն հաջողություն մաղթել ֆուտբոլիստներին։

Անի Մեջլումյան, ազատ լրագրող.- Վերջին հանդիպումների արդյունքները և խաղային տակտիկան դիտարկելով դրական սպասելիքներ չկան: Բացակայում են առաջատար մի շարք ֆուտբոլիստներ, այդ թվում` Հենրիխ Մխիթարյանը: Թիմի ավագի բացակայությունը, մեծ հաշվով, լավ բան չի խոստանում: Ստեղծված իրավիճակը նույնիսկ չեմ կարող համեմատել Սերբիա-Հայաստան դիմակայության հետ, երբ չկային առաջատարներ, սակայն կար խաղ: Դանիայի ընտրանու հետ դիմակայությունում մեր թիմը խաղում էր պաշտպանողական ֆուտբոլ: Պարզ չէ, թե այս 2 խաղերում ինչ տակտիկա կընտրի Վարուժան Սուքիասյանը, ուստի դժվար է ենթադրել, թե ինչ կարող ենք ակնկալել առաջիկա հանդիպումներից:

Գայանե Նազարյան, Sport.slaq.am.- Առանձնահատուկ սպասումներ ու ակնկալիքներ չունեմ Հայաստանի ազգային հավաքականի առաջիկա հանդիպումներից: Դրա հիմքում մի քանի գործոնի միահյուսում է՝ հավաքականի վերջին խաղերից մնացած տպավորություններից մինչև այն կազմը, որ այսօր ունենք՝ օբյեկտիվ ու ոչ այնքան պատճառներով պայմանավորված: Հավաքականի գլխավոր մարզիչն այս հանդիպումներից առաջ որպես նպատակ նշել էր կայուն խաղի ցուցադրումն ու միավորներ վաստակելը, ինչպես նաև փաստել, որ թիմին թարմ լիցք է պետք հաղորդել: Սակայն թե՛ երկրպագուների ու թե՛ մասնագետների համար պարզ է, որ այս հանդիպումներում էլ ոչ թե արդյունք ենք ակնկալելու, այլ՝ նոր ֆուտբոլիստների, «թարմ լիցք հաղորդողների» նոր «խմբաքանակի» փորձարկման ականատեսն ենք լինելու ու վերջում լսենք այն նույն՝ հին սկավառակի չմոռացված մեղեդին. «դե սերնդափոխություն է կատարվում թիմում՝ թե՛ տարիքային ու թե՛ որակական, ժամանակ է պետք…» … Չգիտեմ՝ գործնականում ինչ պատկեր կլինի հոկտեմբերի 8-ին «Հանրապետականում» ու 3 օր անց՝ Լեհաստանում, բայց կուզեի լավատես լինելու գոնե առիթ ունենալ:



Հռիփսիմե Գալստյան, TotalFootball.am,- Կուզեի հավաքականների առաջիկա խաղերի մասին երկար ու հանգամանալից խոսել, բայց իրականությունն այն է, որ արդեն բավականին ժամանակ է` ես մերոնցից հաղթանակներ չեմ սպասում ու, բնականաբար, չեմ հիասթափվում։ Ցավալի է տեսնել երբեմնի հաղթող հավաքականին նման անփառունակ վիճակում, բայց նաև պետք է փաստել, որ այն հավաքականից ոչինչ ու ոչ ոք չկա։ Առաջատարների բացակայություն և այլն, և այլն... սրանք ուղղակի ինքնախաբեություն են։ Նախ, մենք հիմա ընդամենը մի առաջատար ունենք, որի անունը բոլորը գիտեն։ Հետո` Չեխիայի հետ ընկերական խաղը ցույց տվեց, որ նույնիսկ նրա հետ մեր հավաքականը չգիտի` խաղադաշտում ինչ անել։ Դա արդեն մարզչի խնդիրն է։ Նա պետք է լուծումներ գտնի, խաղային պլաններ մշակի ամենատարբեր իրավիճակների համար։ Հավաքական պետք է գան ընտրայլները։ Բայց մեր հավաքականի ընտրության դաշտը ամեն անգամ ավելի է նեղացվում` հասնելով ընդհուպ մինչև ներքին առաջնություն։ Իսկ մեր առաջնության մակարդակը շատ բանի մասին է խոսում։ Անհասկանալի է հավաքականի նկատմանբ այս մոտեցումը, տղաների մոտ մոտիվացիայի գրեթե բացակայությունը, շատերի` գնդակի հետ վարվելու ձև չիմանալը։ Ու այդ ամենի ֆոնին աններելի լավատես է պետք լինել` հաղթանակ ակնկալելու համար։ Մենք բոլորս հիմա ընդամենը պարտականություն ենք կատարում։



Հասմիկ Բաբայան, Sport.mediamax.am,- Աշխարհի առաջնության ընտրական մրցաշարում դեռ մեկ հանդիպում ենք անցկացրել, որը, ցավոք, այդքան էլ լավ չի դասավորվել մեր հավաքականի համար: Առաջիկայում տնային հանդիպում է սպասվում, հուսանք, որ ֆուտբոլիստներն ամեն ինչ կանեն սեփական երկրպագուներին չհիասթափեցնելու համար: Ամեն դեպքում` դժվար հանդիպում է լինելու, մենք խմբի հետնապահն ենք, բազմաթիվ խնդիրներ ունենք, որոնց թվում եւ առաջատարների բացակայությունը չեն կարող զգացնել չտալ: 4 թիմեր` այդ թվում և Ռումինիան, մեկ միավոր ունեն, ու մեզ հետ խաղում նրանք անպայման փորձելու են ձեռնունայն չվերադառնալ հայրենիք: Լեհաստանի հետ շատ ավելի դժվար է լինելու, թիմում քիչ չեն ուժեղ ֆուտբոլիստները, որոնք եվրոպական ակումբներում կայուն խաղ են ցուցադրում: Ղազախստանի հետ անակնկալ ոչ-ոքիից հետո տնային խաղում, կարծում եմ ամեն ինչ կանեն 3 միավոր վաստակելու համար: Եթե մեր ֆուտբոլիստներին հաջողվի 2 խաղերում գոնե մեկ միավոր վաստակել, արդեն իսկ վատ չի լինի:

Կատարինե Այդինյան, Mamul.am,- Մեր հավաքականի համար բարդ հանդիպումներ կլինեն։ Հիշելով Դանիայի ընտրանու դեմ դժգույն խաղը՝ դժվար է պատկերացնել, որ թիմը լավ ֆուտբոլ կխաղա, առավել ևս թիմի ավագ Հենրիխ Մխիթարյանի բացակայությամբ։ Մինչ այս, խաղը հիմնականում կառուցվում էր Մխիթարյանի վրա, իսկ նրա բացակայությամբ նման մակարդակի ֆուտբոլիստ հավաքականում չկա։ Հրավիրվածների թվում շատ են խաղային պրակտիկա գրեթե չունեցող և վնասվածքներից հետո նոր վերականգնված խաղացողները, այնինչ սկզբունքորեն չհրավիրվող ֆուտբոլիստները հաջող են հանդես գալիս իրենց ակումբներում։ Բայց սա արդեն այլ հարց է։ Թվում է, որ համեմատաբար ուժեղ է պաշտպանության գիծը, և, կարծում եմ, որ Սուքիասյանը շեշտը կդնի պաշտպանության վրա՝ հնարավորության դեպքում հակագրոհներ կազմակերպելով։ Ստեղծված իրավիճակում երկու խաղերում հաղթանակներ տոնելու հնարավորություններն, իրոք, շատ ցածր են, բայց, ինչպես ասում են, սա ֆուտբոլ է, և ամեն ինչ հնարավոր է։ Պատմությունը բազմաթիվ դեպքեր գիտի, երբ ակնհայտորեն թույլ թիմը կարողանում է հաղթել ուժեղ մրցակցին։ Ինչևէ, անկախ ակնկալիքներից և սթափ դատողությունից, պետք է միշտ լինենք մեր հավաքականի կողքին՝ աջակցելով մեր ֆուտբոլիստներին ինչպես հաղթանակի բերկրալի պահերին, այնպես էլ անհաջողությունների ու պարտությունների ժամանակ։ Այնպես որ, առա՛ջ՝ դեպի հաղթանակ:

Քրիստինա Խաչատրյան, «Հայկական ժամանակ»,- Ցավոք սրտի, առաջիկա 2 խաղերում մեր ընտրանին ոչ միայն պարտություն է կրելու, այլև խաղալու է դժգույն և ոչ գրավիչ ֆուտբոլ: Տարբեր պատճառներով բացակայելու են առաջատար ֆուտբոլիստներ, որոնց մի մասից ֆեդերացիան արդեն բավական ժամանակ է, ինչ վերջնականապես հրաժարվել է: Ինչ վերաբերում է Մխիթարյանին, ապա կարծում եմ, որ ֆեդերացիան ընդառաջելով «Մանչեստեր Յունայթեդին»` առաջին հերթին ի օգուտ ֆուտբոլիստի է որոշում կայացրել, քանի որ վնասվածք ունի, և հավաքական գալը նրա համար կարող էր լրացուցիչ ռիսկ լինել: Ամեն դեպքում անգամ նրա ներկայությունը հավաքականին չէր օգնի լավ խաղ ցույց տալ կամ հաղթել, քանի որ թիմը խաղային բոլոր օղակներում խնդիրներ ունի, որոնք Հենոյի ներկայությունը չի լուծի: Ցավալի է, որ թիմն այս վիճակում է հենց այս ցիկլում, հավանաբար կլինենք միավորներ բաժանողի դերում: Այս պարագայում երկրպագուներին մարզադաշտ կբերի ոչ թե գեղեցիկ ֆուտբոլ նայելու ցանկությունն ու հաղթանակի ակնկալիքը, այլ մեծ հայրենասիրությունն ու նվիրվածությունը հավաքականին:



Հռիփսիմե Ղազարյան, Panorama.am
Աշխարհի առաջնության ընտրական փուլի դանիացիների հետ մեկնարկային խաղում մեր ընտրանին խաղադաշտ դուրս եկավ 5 պաշտպանով: Նման բարձրակարգ հանդիպումներում, երբ նպատակ է դրվում ընդամենը գնդակ բաց չթողնել, տեղի է ունենում հակառակը: Չեմ ցանկանում, որպեսզի Ռումինիայի և Լեհաստանի հավաքականների հետ խաղերն ընթանան նույն սցենարով: Ցանկությունս մեկն է, որպեսզի այս տղաները կարողանան հաղթահարել առաջատարների բացակայության պայմաններում առաջ եկող հոգեբանական խնդիրները ու հավատան սեփական հաղթանակին: Ի վերջո, այն ֆուտբոլիստները, որոնք հավաքականում են բացակա խաղացողների պատճառով, լավ հնարավորություն ունեն ցուցադրելու և ամրապնդելու դիրքերն ընտրանու կազմում: Ուզում եմ, որ անգամ ոչ-ոքի արդյունքին երազանքի պես սպասող երկրպագուն կրկին տխրի այդ նույն ոչ-ոքիից, քանի որ ժամանակին մեզ բավարարում և ուրախացնում էին միմիայն հաղթանակները: Հաջողություն մեր տղաներին և թող հաղթի ուժեղագույնը…