Ձեր վստահելի աղբյուրը

Քաոսային վիճակ է տիրում ոչ միայն սիրիահայության, այլև սիրիահայ ղեկավար մարմինների մոտ: «Արևելք» պարբերականի հետ զրույցում նման կարծիք է հայտնել սփյուռքահայ մտավորական Հրաչ Չիլինգարյանը:

Նա հիշեցրել է Դամասկոսի թեմի առաջնորդի խոսքը, որի համաձայն, Հայաստանի ղեկավարութունը մի բան է անում, տեղական մարմինները՝ մեկ այլ բան, համակարգված աշխատանք չկա:

«Մանավանդ այս կացության մեջ շատ բան անել չեն կարող, ամեն վայրկյան ռումբեր են պայթում: Հիմա ամենակարևոր խնդիրը միջանցք ապահովելն է, որպեսզի ժողովուրդը կարողանա ավելի ապահով տեղեր փոխադրվի»,-ասել է նա:

Անդրադառնալով այս օրերին անընդհատ  քննարկվող հարցերին՝ տարհանե՞լ Հալեպը, թե՞ պահպանել հայ համայնքը, Չիլինգարյանը պատասխանել է.

«Մեր խնդիրն այլևս մայր գաղութը պահել կամ չպահելը չէ: Այդ մոտեցումն արդեն անցյալին է  պատկանում: Հիմա կենաց մահու խնդիր է՝ ինչպե՞ս կարելի է ժողովրդի կյանքը փրկել: Հայ ավետարանական եկեղեցու նախագահ Հարություն Սելիմյանը Հալեպի մեջ դիմադրում է ժողովրդի հետ: Նա սփյուռքին, պետություններին ու համայնքներին ուղղված ահազանգ է  հնչեցրել, բայց ո՞վ է լսողը»:

Նա կարծիք է հայտնել, որ սիրիահայերի խնդրի լուծման գործում Սփյուռքն ու Հայաստանն իրար վրա են հարցը գցում:

«Մյուս կողմից ակնհայտ է, որ Սփյուռքը կարողություն այլևս չունի սիրիահայերի խնդիրներին մշտական լուծումներ գտնելու: Իմ կարծիքով, սփյուռքի անկարողությունը կարևոր բացահայտում է»,-ասել է նա:

Մտավորականի հետ հարցազրույցն ամբողջությամբ սկզբնաղբյուր կայքում: