Ձեր վստահելի աղբյուրը

Հայաստանի ֆուտբոլի ազգային հավաքականի նախկին կիսապաշտպան Լևոն Պաչաջյանը Ռումինիայի ընտրանու հետ աշխարհի 2018 թ. առաջնության ընտրական հանդիպումից առաջ հայտարարել է, որ մեր ֆուտբոլն օրեցօր անկում է ապրում, և ժամանակն է, որպեսզի պետությունը դեմքով շրջվի դեպի միլիոնների խաղը և նախադրյալներ ստեղծի զարգացման համար։ Մասնավորապես՝ նա առաջարկում է 1-2 բանակային թիմ ստեղծել և 18-20 տարեկան ֆուտբոլիստներին մարզվելու հնարավորություն տալ։

«Քանի որ օրը ֆուտբոլային է, ուզում էի մի քանի միտք գրել հայկական ֆուտբոլի վերաբերյալ... Սա ավելի շուտ առաջարկ դիմում է մեր պետական այրերին, Սպորտի և Պաշտպանության նախարարություններին։

«Եթե Հայաստանի ժողովրդի գերակշռող մասն անտարբեր չէ հայկական ֆուտբոլի նկատմամբ, և բոլորն ուզում են, որպեսզի հայկական ֆուտբոլը նորից զարգանա և մրցունակ լինի Եվրոպայում, ապա չե՞ք կարծում, որ ժամանակն է պետական աջակցություն ցուցաբերել ֆուտբոլին։ Բացի ֆինանսական և ծրագրային լուծումներից, այդ աջակցության մի մասն էլ կարող է կազմել մեկ կամ երկու բանակային ակումբ հիմնելը, հիմնականում՝ մարզերում։ Բոլորս էլ գիտենք, որ Հայկական Բանակում պե՛տք է և մեծ պատիվ է ծառայելը, բայց 18-20 տարեկան ֆուտբոլիստը, կտրվելով մարզումներից և խաղերից, անմրցունակ է դառնում, և մենք մի ամբողջ սերունդ ենք կորցնում։ Ծառայության հետ համատեղելով ֆուտբոլային մարզումները՝ մեր երիտասարդները կարող են զարգացնել իրենց ունակությունները և 20 տարեկանում արդեն մրցունակ և կայացած ֆուտբոլիստ լինել։ Բոլորս էլ գիտենք, որ այսօր ֆուտբոլը 7 մետրանոց քայլերով առաջ է շարժվում, և անգամ մեկ մարզում բաց թողնելը ֆուտբոլիստի համար կարող է ճակատագրական լինել։ Ժամանակն է, որպեսզի մեր պետությունը աջակցի ֆուտբոլին, որը, ցավոք, ամեն օր անկում է ապրում»,- գրել է Պաչաջյանը ֆեսբուքյան իր էջում։