Ձեր վստահելի աղբյուրը

Հոկտեմբերի 11-ին Վարշավայի «Ազգային» մարզադաշտում կկայանա աշխարհի գավաթի 2018 թ. խաղարկության Լեհաստան-Հայաստան ընտրական հանդիպումը: Երեկ «Ազգային»  մարզադաշտի մամուլի ասուլիսների սրահում կայացավ մեր թիմի գլխավոր մարզիչ Վարուժան Սուքիասյանի և կիսապաշտպան Դավիթ Մանոյանի նախախաղային մամուլի ասուլիսը, որը ներկայացրել է ՀՖՖ պաշտոնական կայքը։

- Հնարավո՞ր է արդյոք կարճ ժամանակահատվածում հոգեբանորեն վերականգնվել վերջին խաղում կրած պարտությունից հետո, և ինչպիսի՞ն է իրավիճակը հավաքականում՝ հաշվի առնելով Հենրիխ Մխիթարյանի բացակայությունը։
- Հավաքականն այսօր կադրային լուրջ խնդիրներ ունի: Դուք շեշտեցիք Հենրիխ Մխիթարյանի անունը: Բնական է՝ նա մեր թիմի առաջատար ֆուտբոլիստն է, բայց ֆուտբոլը թիմային խաղ է: Մենք պետք է շուտ մոռանանք այդ պարտությունը: Անցած խաղից առաջ լուրջ կորուստ ունեցանք: Մեր թիմի հարձակվողը վնասվածք ստացավ, դրանից հետո խաղի 3-րդ րոպեին՝ 11 մետրանոց և հեռացում: Ոչ ոք չէր սպասում, որ իրադարձություններն այդպես կընթանան, այնպես որ՝ կարծում եմ վաղվա խաղը լարվածության մեջ կպահի հանդիսատեսին:

- Պարտությունից հետո թիմում ի՞նչ տրամադրություն է, և արդյո՞ք զգացվում է Մխիթարյանի բացակայությունը նաև հանդերձարանում (հարց Դավիթ Մանոյանին)։
- Թիմում նորմալ տրամադրություն է, փորձում ենք մոռանալ այդ խաղը, որքան հնարավոր է, շուտ: Լավ է, որ հաջորդ խաղն արդեն վաղն է, ինչը լավ հնարավորություն է հետ բերելու մեր երկրպագուների հարգանքը: Մխիթարյանը շատ կարևոր ֆուտբոլիստ է մեզ համար թե խաղադաշտում, թե հանդերձարանում, և նրա բացակայությունն զգացվում է:

- Ինչպե՞ս եք գնահատում Լեհաստանի հավաքականի ներուժը, որո՞նք են թիմի ուժեղ և թույլ կողմերը, ինչպիսի՞ խաղ կլինի վաղը (հարց Վարուժան Սուքիասյանին և Դավիթ Մանոյանին)։
- (Վարուժան Սուքիասյան) Մենք լավ գիտենք Լեհաստանի հավաքականի ուժեղ և թույլ կողմերը: Լեհաստանը խմբի ֆավորիտներից մեկն է: Ուժեղ հավաքականի հետ ենք խաղալու և, կարծում եմ, կընտրենք ճիշտ մարտավարություն:
- (Դավիթ Մանոյան)  Գաղտնիք չէ, որ Լեհաստանի հավաքականն աշխարհի ուժեղ հավաքականներից մեկն է: Ուժեղ է նաև այն պատճառով, որ ձեր հավաքականում խաղում է աշխարհի լավագույն հարձակվողներից մեկը: Անշուշտ, բացի Լևանդովսկուց, թիմում հավաքված են շատ փորձառու ու արագաշարժ ֆուտբոլիստներ, որոնց մենք գիտենք թե Դորտմունդի «Բորուսիայից», որտեղ խաղում էր Մխիթարյանը, թե այլ առաջնություններից: Մեզ ծանր հանդիպում է սպասվում:
    
- 2007 թ. Հայաստան-Լեհաստան հանդիպումն ավարտվեց Հայաստանի հավաքականի հաղթանակով: Վաղվա խաղից առաջ արդյոք հիշո՞ւմ եք այդ պատմական խաղը (հարց Դավիթ Մանոյանին)։
- Իհարկե, հիշում ենք այդ խաղը: Ես այդ հանդիպմանը տրիբունայից էի հետևում, բայց երկու հավաքականներն էլ այժմ ուրիշ կազմերով են, և չեմ կարծում, որ այդ խաղն ինչ-որ կապ ունի վաղվա հանդիպման հետ:

- Լեհաստանի հավաքականում նույնպես կան կորուստներ: Կկարողանա՞ք օգտագործել այդ հանգամանքը (հարց Դավիթ Մանոյանին)։
- Մեր մարզիչն ավելի լավ է ուսումնասիրել հակառակորդին և կասի մեզ՝ ինչպես ճիշտ օգտագործել մեր հնարավորությունները: Լեհաստանի հավաքականում շատ վտանգավոր են եզրային ֆուտբոլիստները: Մեր թիմը վնասվածքների պատճառով շատ է տուժել, 5-6 ֆուտբոլիստներ բացակայում են, գուցե Լեհաստանի վրա էլ դա ազդի:

- Ռումինիայի հետ խաղից առաջ նշեցիք, որ կա ֆուտբոլիստ, ով կարող է փոխարինել Մխիթարյանին, բայց կարծես թե այդպիսի խաղացողի չտեսանք խաղադաշտում: Կասե՞ք՝ ում մասին էր խոսքը։
- Գիտեք, ես չէի ասի, որ նա լիարժեք կկարողանար փոխարինել Մխիթարյանին: Խաղի ընթացքում մարտավարությունը փոխվեց, հատկապես երբ մնացինք 10 հոգով: Տղաները հոգեբանորեն չկարողացան վերագտնել իրենց խաղը, և այդ ֆուտբոլիստը դաշտում չերևաց:

- Պատրաստվելով այս հանդիպմանը՝ Լեհաստանի հավաքականի ո՞ր խաղերն եք վերլուծել,  և կա՞ մեր խմբում հավաքական, որին կուզենայիք նմանվել։
- Ընդհանրապես՝ մարզիչն ընտրում է մարտավարություն՝ ելնելով այն ֆուտբոլիստներից, ովքեր իր տրամադրության տակ են: Այսօր կադրային մեծ խնդիրներ կան։ Ելնելով դրանից՝ ընտրելու ենք մարտավարությունը: Իսկ նմանվել կարելի է, երբ բոլոր ֆուտբոլիստները շարքում լինեն: Ես նայել եմ Լեհաստանի հավաքականի մասնակցությամբ հանդիպումներ, այդ թվում՝ Եվրոպայի առաջնությունում: Լավ ծանոթ եմ Լեհաստանի հավաքականի խաղաոճին, և տեսնենք, թե տղաներն ինչպես կկարողանան կատարել առաջադրանքները:

- Ո՞ր թիմերն են մեր խմբի ֆավորիտները։
- Եռյակի մասին խոսենք։ Առաջին հերթին կառանձնացնեի Լեհաստանի և Դանիայի հավաքականներին, այնուհետև՝ Ռումինիայի ընտրանուն: Ես կարծում եմ, որ այդքան էլ հեշտ չհաղթեցիք Դանիայի թիմին: Լավ ֆուտբոլ ցուցադրեց նաև Մոնտենեգրոյի ընտրանին:

- Ռումինիայի հավաքականի հետ խաղից հետո ինչո՞ւ հրավիրվեց Ռուսլան Կորյանը։ Դանիացիների դեմ խաղացինք հինգ պաշտպանով, ռումինացիների դեմ` չորս: Արդյոք պետք է կրկի՞ն սպասել փոփոխությունների պաշտպանական գծում։
- Ինչպես տեսնում եք, որոշ հարցերի մի քիչ փակ եմ պատասխանում: Որոշ հանգամանքերից ելնելով՝ հրավիրեցի: Պաշտպանության վերաբերյալ որոշումը կտեսնեք վաղը:

- Ինչպես երևում է, ծանր սրտով եք եկել Լեհաստան և շատ հուզված եք երևում:
- Հուզված էի, դա մեկ օրում անցնում է, տեսնենք՝ տղաներն ինչպես կաշխատեն դաշտում:

- Եթե վաղը պարտվենք, կարո՞ղ ենք համարել, որ ընտրական մրցաշարը ձախողված է, թե՞, եթե բոլոր ֆուտբոլիստները շարք վերադառնան, հնարավոր կլինի շտկել իրավիճակը։
- Եկեք լավ տրամադրվենք վաղվա խաղին: Դեռ ոչինչ կորած չէ։ Եթե հիշում եք ԱՄՆ-ում կայացած հանդիպումները, մենք ամբողջական կազմով խաղացինք: Չմոռանանք նաև, որ առաջին երեք խաղում շատ ծանր մրցակիցներ են՝ իմ նշած եռյակի թիմերը:

- Ընտրական փուլից առաջ ի՞նչ առաջադրանք էր դրված Ձեր առջև, և արդյոք այն փոխվե՞լ է, թե՞ ոչ։ Եվ երկրորդը՝ նախորդ ասուլիսի ժամանակ Դուք ասացիք, որ հրավիրել էիք Յուրա Մովսիսյանին, և նա չէր եկել: Փորձե՞լ եք կրկին հրավիրել։
- Բոլոր մարզիչներն էլ ցանկանում են լավ արդյունք արձանագրել, դա նաև ֆուտբոլասերների պահանջն է, բայց վիճակահանությունը և մարզական բախտը մեր կողմը չէին: Ամեն դեպքում՝ պետք չէ ընկճվել։ Պետք է դուրս գանք լավ խաղ ցուցադրելու: Ես չեմ ասել, որ հրավիրել եմ Յուրային, մենք պայմանավորվել էինք հանդիպել, բայց նա չեկավ: