Ձեր վստահելի աղբյուրը

««Օքսվամ» կազմակերպության հայաստանյան գրասենյակը արդեն երկրորդ տարին է ներգրավված է սիրիահայերին օգնելու ծրագրի մեջ»,-այսօր լրագրողների հետ հանդիպմանը հայտնեց «Օքսֆամ» հայաստանյան գրասենյակի տնօրեն Մարգարիտա Հակոբյանը:

Նա նշեց, որ իրենք հիմնականում լուծում են տան վարձի մասնակի փոխհատուցման  հարցերը. «Անապահով ընտանիքների բնակարանի վարձը մասնակի փոխհատուցում ենք, մոտավորապես, երեք ամսվա կտրվածքով՝ 60-ից 80 հազար դրամի շրջանակներում: Լինում են դեպքեր, երբ աջակցում ենք մինչև մեկ տարվա կտրվածքով: Անցյալ տարվա ծրագրում մոտ 300 ընտանիքի նման աջակցություն է ցուցաբերվել, այս տարի ևս նույնքան ընտանիքի աջակցություն կցուցաբերվի»:

Մարգարիտա Հակոբյանի խոսքով վերջին շրջանում համացանցում պտտվում են թվեր, թե Հայաստան են գալու 600 սիրիահայեր, սակայն այս տեղեկատվությունը խեղաթյուրված է. «Այսօր ենք եղել սփյուռքի նախարարությունում և ըստ նրանց տեղեկատվության ընդամենը 3 ընտանիք է եկել Հայաստան, մեկ ընտանիք էլ այսօր է գալու»:

Հանդիպմանը ներկա Հայկական կարմիր խաչի ընկերության լրատվական, լուսաբանման բաժնի վարիչ Նունե Գրիգորյանն էլ ասաց, որ իրենց սիրիահայերի խնդիրներով սկսել են զբաղվել 2012 թվականի աշնանից:

Նրա խոսքով՝ Հայաստան ժամանած բոլոր սիրիահայերը գրանցված են կարմիր խաչում և դրանք թվով 5 հազարն են:

«Հաշվի առնելով սիրիահայերի ցանկությունը մտցվել է տնտեսական ինքնաբավության բաղադրիչը, այսինքն՝ սիրիահայերի համար ստեղծվում էր պայմաններ, որ սկսեն իրենց սեփական բիզնեսը և որևէ մեկից կախված չլինեն: Նրանց տրամադրվում էր նաև բիզնես-խորհրդատվություն»,-նշեց Նունե Գրիգորյանը:

«Սիրիահայերին աջակցելու ծրագրերին այս տարվանից միացել է նաև «Առաքելություն արևելք» մարդասիրական օգնության կազմակերպությունը:

Կազմակերպության տարածաշրջանային գրասենյակի տնօրեն Արմեն Բեժանյանը տեղեկացրեց, որ իրենք  համագործակցում են մի շարք կազմակերպությունների հետ. « Մեր նպատակն է բնակվարձի մասնակի հատուցումը, ծրագրում կա նաև ձմեռնամուտի ապահովման բաղադրիչ և սոցիալ-հոգեբանական աջակցություն»:

Ըստ Բեժանյանի՝ հարկավոր է նմանատիպ ծրագրեր իրականացնող պետական և ոչ պետական կազմակերպությունները համակարգված աշխատանքեն. «Սիրիահայերի անվանական ցուցակների կարիք կա: Անվանականացումը շատ կարևոր հանգամանք է ինֆորմացիայի տրամադրան, սոցիալական ծրագերի ու գրանցման խնդրիներ իրականացնելու համար»:

«Օքսֆամ» հայաստանյան գրասենյակի տնօրեն Մարգարիտա Հակոբյանը վերջում տեղեկացրեց, որ մինչ պատերազմը Սիրիայում 120 հազար հայ է եղել, ներկայումս այնտեղ 25-30 հազար հայ կա. «Հայաստանն այս տարիների ընթացքում եկել է 21-22 հազար սիրիահայ, սակայն այդ թիվը գնալով նվազել է՝ հասնելով 6-հազարի»: