Ձեր վստահելի աղբյուրը

Այսօր ակտիվ քաղաքականություն մտնելու հայտ ներկայացրած ՀՀ նախագահի աշխատակազմի ղեկավարի արդեն նախկին տեղակալ Վիկտոր Դալլաքյանը հայտարարեց, որ պատրաստվում է մասնակցել 2017-ի խորհրդարանական ընտրություններին, սակայն դեռ չի հրապարակի, թե ինչ ձևաչափով է լինելու կուսակցությունը:

«Դուք գիտեք, որ նոր Ընտրական օրենսգրքով միայն քաղաքական ուժերը կարող են մասնակցել խորհրդարանական ընտրություններին: Ես հայտարարում եմ, որ այն ձևաչափը, որով կմասնակցեմ խորհրդարանական ընտրություններին, դա կլինի համապատասխան կուսակցական ցուցակը: Թույլ տվեք, այսօր փակագծեր չբացեմ, բայց ես ձեզ խոստանում եմ, որ հրապարակային կտեղեկացնեմ ձեզ ֆորմատը», -հայտարարեց Դալլաքյանը:

Լրագրողները հետաքրքրվեցին, թե ճի՞շտ են մամուլում շրջանառվող տեղեկությունները, որ Սեյրան Օհանյանը ակտիվ առնչություն է ունենալու Դալլաքյանի հետ կապվող կուսակցության հետ, բանախոսը պատասխանեց. «Սեյրան Օհանյանը իր գործունեության և ծրագրերի մասին, որևէ հրապարակային հայտարարություն չի արել, հետևաբար ձեռնպահ կմնամ որևէ հրապարակային հայտարարություն չկատարած անձնավորության ծրագրերի հետ կապված որևէ գնայհատական տալ»:

Նաև ասաց, որ բարձր է գնահատում Սեյրան Օհանյանի գործունեությունը ու հավելեց. «Ցանկացած կուսակցության համար պատվաբեր կլիներ, որպեսզի նման պետական, ռազմական գործիչը համագործակցեր այդ կուսակցության հետ»: