Ձեր վստահելի աղբյուրը

«Օսկար» 89-րդ մրցանակաբաշխության «Լավագույն օտարալեզու ֆիլմ» անվանակարգի երկար ցանկում ընդրկվել է 85 ֆիլմ: Հայ-ռուսական արտադրության, ռեժիսոր Սարիկ Անդրեասյանի «Երկրաշարժ» ֆիլմը, որը Հայաստանի ազգային կինոակադեմիայի անդամների քվեարկության արդյունքում ընտրվել և ներկայացվել էր մրցանակաբաշխությանը, չի ընդգրկվել ցանկում:

«Ֆիլմն ուղարկվել էր «Մարս մեդիա» կինոընկերությունը, մեր կինոակադեմիան տվել էր համապատասխան փաստաթղթերը: Ուղարկվել է որպես հայկական  ֆիլմ: Ֆիլմը հենց առաջին էտապում քննարկան չի դրվել ոչ թե նրա համար, որ  վատն է  կամ լավը,  այլ որովհետև չափորոշիչները որպես հայկական ֆիլմ, չեն համապատասխանել այն դրույթներին, ինչն անհրաժեշտ է «Օսկար»-ին օտարալեզու ֆիլմ ներկայացնելու համար»,- Panorama.am-ի հետ զրույցում ասաց Հայաստանի Ազգային կինոկենտրոնի տնօրեն Գևորգ Գևորգյանը:

Նրա խոսքով՝ մրցանակաբաշխության կանոնների համաձայն, «Լավագույն օտարալեզու ֆիլմ» անվանակարգում ներկայացված ֆիլմի մեծ մասը պետք է նկարահանված լինի այն երկրում, որի կողմից ներկայացված է լինում, հեղինակները լինեն այդ երկրից, այդ երկրում ապրող, այդ երկրում գրանցված:

«Քանի որ հայ-ռուսական համատեղ արտադրության ֆիլմ է, փաթեթն ուղարկողները չեն նշել փաստաթղթերում, թե որքան մասն է նկարահանվել Հայաստանում, ովքեր են հայ, ովքեր են ծնվել Հայաստանում, գրանցված Հայաստանում:  Այնտեղ էլ տեսել են, որ մեծ մասը ռուսական է, չեն ընդունել: Մենք լրացուցիչ նամակ ենք ուղարկել, ներկայացրել ենք որքան մասն է նկարահանվել Հայաստանում,  ստեղծագործական խմբից, դերասաններից ովքեր են գրանցված Հայաստանում: Այսինքն լրացուցիչ տեղեկանք ենք ուղարկել, ըստ որի՝ անհրաժեշտ չափորոշիչներին ֆիլմը համապատասխանում է: Արդեն չգիտեմ՝ չի ընդունվել, որովհետև մեր փաստաթղթերը համոզիչ չեն եղել, ուշացրել ենք ու չեն վերանայել, թե վերանայել են ու չեն ընդունել: Տեղեկություն չունեմ: Բայց մի փոքր հույս կա, որ եթե փաստաթղթերն ուսումնասիրեն, որոշումը վերանայեն», - մանրամասնեց կինոկենտրոնի տնօրենը:

Գ. Գևորգյանն ընդգծեց, որ միջազգային կառույցները շատ բծախնդիր են, օրենքերը, կանոնները պետք է պահպանվեն:

Ըստ կինոկենտրոնի տնօրենի, թեկուզ թույլ ֆիլմերով, բայց Հայաստանը պետք է մասնակցի միջազգային միջոցառումներին, որպեսզի չմոռացվի, որպեսզի հայկական կինոն մոռացության չմատնվի:

«Մենք համառորեն Կաննում, նույնիսկ սուղ պայմաններին, մի փոքր խուց էինք վերցնում: Ամեն տարի վերցրեցինք ու արդեն բանակցություններ ենք վարում տարբեր երկրների կինոարտադրողների հետ,  համագործակցում ենք, համատեղ ֆիլմեր ենք ստեղծում»,- նշեց Գ.Գևորգյանը: