Ձեր վստահելի աղբյուրը

Տնտեսագետ Աշոտ Խուրշուդյանը Հայաստանին առաջիկայում սպառնացող իրական տնտեսական աղետի հիմքեր այս պահին չի տեսնում:

«Ավելի ուժեղ ճգնաժամեր են  եղել: Խոսքում փաստարկում չկա, չգիտեմ, թե ինչ է ի նկատի ունեցել առաջին նախագահը: Ինչ եղել, եղել է, նոր բան չկա, հակառակը, հիմա պետք է զարգանա տնտեսությունը»,-Panorama.am-ի հետ զրույցում ՀՀ առաջին նախագահ Լևոն Տեր-Պետրոսյանի ահազանգի մասին նման կարծիք հայտնեց տնտեսագետը:

Նա նշեց, որ Տեր-Պետրոսյանի խոսքում իր համար անհասկանալի բաներ կան,  սակայն մի բան հաստատ գիտի. «Հայաստանը դեֆոլտի եզրին չէ: Չկա նման բան, որևէ հիմք չեմ տեսնում: Մեծ  արտաքին պարտք ունենք մարվող, եվրոպական պարտատոմսերն են, որոնք վերաթողարկվելու են: Ենթադրում եմ, որ սա ի նկատի առաջին նախագահը»:

Տնտեսագետը հայտարարությունն ընկալում է  որպես քաղաքական հայտարարություն՝ ուղղված քաղաքական ուժերին:

Հանրապետական խմբակցության անդամ, տնտեսագետ Գագիկ Մինասյանը ծանոթ չէր Տեր-Պետրոսյանի հայտարարությանը: Ասաց՝ վաղը կարող է մեկնաբանել այն:

Հայաստանի գործատուների հանրապետական միության նախագահ Գագիկ Մակարյանն էլ Panorama.am-ի հետ զրույցում կարծիք հայտնեց, որ Տեր-Պետրոսյանի ահազանգը կարող է քաղաքական բովանդակություն ունենալ:

«Ինձ թվում է՝ առաջին նախագահը զգոնության է բերում, որովհետև մենք նոր բյուջեի կազմման փուլում ենք, դեռ ընտրական պրոցեսներ են լինելու: Հայտարարությունը կարող է նաև քաղաքական հետաքրքրություն ունենալ: Չնայած Տեր-Պետրոսյանը դուրս  է եկել քաղաքականությունից, բայց իր կուսակցությունը կա: Հնարավոր է 2017-ի համար քաղաքական շահերի տեսանկյունից իր մանդատը՝ կուսակցության միջոցով ներկայացնի»,-ասաց նա:

Տնտեսագետը նշեց, որ այս պահին երկրում առկա են աղքատության, գործազրկության բարձր մակարդակ, ձեռնարկությունների հնարավորությունների մեծ նվազում, մարդկանց գնողունակությունն ընկած է, փոքր ձեռնարկություններն անընդհատ փակվում են ու բացվում, տարածաշրջանային սպառնալիքներ ու ռիսկեր կան, կոռուպցիայի ու ստվերի բարձր մակարդակ:

«Այս ֆակտորների դեմ նոր կառավարությունը խիզախաբար դուրս է եկել  պայքարի: Արագ-արագ փորձում է բիզնես միջավայրը լավացնել, որ էկոնոմիկան մի քիչ զարգանա, հայտարարել է, որ պայքար է մղելու ստվերի ու կոռուպցիայի դեմ, համայնքներում կա փողերի վատնում, փորձում է օպտիմալացնել  2017-ի բյուջեում, համայնքներին առաջարկել է ունենալ առաջիկա տարիների զարգացման ծրագրեր, որպեսզի նրանց ներքաշի սոցիալտնտեսական պրոցեսների մեջ»,-ասաց նա:

Նկատեց, որ այս պահին խնդիրներ կան նաև բանկային համակարգում, որը կարևոր է տնտեսության մեջ ֆինանսներ ներարկումներ կատարելու համար:

Գ. Մակարյանը նշեց, որ վերջին ՏԻՄ ընտրություններում չնայած Հանրապետականը հաղթանակ տարավ, սակայն դա չի նշանակում որ ժողովուրդն ընտրեց:

«Գիտեք, ժողովրդի մեծ մասն անտարբեր է, իսկ Հանրապետականը զանգվածային անդամություն ունի: Հնարավոր է Հանրապետականի օգտին ընտրություններին մասնակցի, օրինակ 300 հազար մարդ, մյուսների կողմից՝ 100 հազար: Ինչքան էլ իրենք իրենց կոտորեն, Հանրապետականն անցել է»,-ասաց միության ղեկավարը, ավելացնելով, որ իշխանությանը պետք է հուզի ժողովրդի դիսկոնստրուկտիվ վիճակը, միատարրությունը:

Լսելով ՀՀ նախագահի՝  կառավարության առաջ դրած անելիքները, վարչապետի «հավեսով» գործին կպնելը, սկզբունքային խնդիրների առաջադրումը, ներդրումները խթանող համաժողովի անցկացումը Մակարյանի մոտ հույս է առաջացել, որ երկիրը պետք է «պոռթկում անի» ու այս վիճակից դուրս գա:

«Հայտնի տնտեսագետ, գիտնական Աբել Աղամբեկյանի վերլուծությամբ, մի քանի տարի անց Ռուսաստանը կարող է 4 տոկոս տնտեսական աճ ունենալ: Այսինքն, տենդենցներ կան,  սակայն եթե ֆորսմաժորային իրավիճակ ստեղծվի, Ռուսաստանը մեզ իր հետ կքաշի»,-ասաց տնտեսագետը:

Նա կարծում է, որ Տեր-Պետրոսյանի հայտարարությունը հիմնված է իր թիմի կողմից արված տնտեսական ու քաղաքական վերլուծությունների  վրա, մտածում է, որ առաջին նախագահն իր խորաթանցությամբ կարող է մի քանի տարի առաջ տեսնել: 

«Ես չեմ ուզում անհամեստ երևալ ու որևէ նախագահի ասածները շատ վերլուծել: Ռիսկեր բավականին կան, դա հաստատ, ուղղակի այդ ռիսկերից վախենալ պետք չի: Ավելի լավ է՝ ռիսկերը ճիշտ ասել ու գրանցել, հետո կառավարել: Քանի որ եթե ռիսկերը չես գնահատում, ապա դրանք չես էլ կառավարելու: Ընդ որում ռիսկերի չնկատելը կարող է լինել մի քանի պատճառներով՝ չես ցանկանում, չես նկատում, չես գնահատել, չես էլ կարողանում կառավարել»,-շղթան ներկայացրեց Մակարյանը: