Ձեր վստահելի աղբյուրը

ՄԱԿ-ի մանկական հիմնադրամի (ՅՈՒՆԻՍԵՖ), Հայկական պետական մանկավարժական համալսարանի /ՀՊՄՀ/ և ՀՀ կրթության և գիտության նախարարության նախաձեռնությամբ Հայկական պետական մանկավարժական համալսարանում այսօր մեկնարկեց Բարձրագույն մանկավարժական կրթության բարեփոխումները ներառականության համատեքստում միջազգային աշխատաժողովը: Այն ազդարարեց ՅՈՒՆԻՍԵՖ-ի նախաձեռնությամբ և աջակցությամբ 2016-2018թթ. ՀՊՄՀ-ի և ԱՄՆ Մինեսոտայի համալսարանի գործընկերության պաշտոնական մեկնարկը։

Աշխատաժողովին ներկա ՀՊՄՀ ռեկտոր Ռուբեն Միրզախանյանը նշեց, որ գործընկերության նպատակն է ՀՊՄՀ հատուկ կրթության ֆակուլտետի դասախոսներին փոխանցել ներառական կրթության կազմակերպման վերաբերյալ միջազգային փորձը, իրականացնել կրթական ծրագրերի և ֆակուլտետում դասավանդվող առարկաների բովանդակության վերանայում։

«Համագործակցության  շրջանակներում, միջազգային խորհրդատվության և տեխնիկական աջակցության շնորհիվ կամրապնդվեն ՀՊՄՀ-ի կրթական, հետազոտական, ինչպես նաև ներառական կրթությանն արդյունավետ աջակցելու կարողությունները, հատուկ կրթության ֆակուլտետին առընթեր կհիմնադրվի ներառական կրթությանը աջակցող լաբորատորիա»,-տեղեկացրեց ռեկտորը:

Ազգային ժողովի առողջապահության, մայրության և մանկության հարցերի մշտական հանձնաժողովի նախագահ Արա Բաբլոյանի խոսքով էլ Հայաստանն առաջիններից է նախկին խորհրդային երկրներից, որն անդրադառձավ ներառական կրթության հարցերին. «Այս ճանապարհը շատ դժվար է, քննադատություններ ունեցել ենք և կունենանք, բայց պետք է կարողանանք մենք մեր մոդելը ստեղծել՝ աշխարհի լավագույն փորձի հիման վրա»

Բաբլոյանի խոսքով՝ երեխաների ներառականությունը մեխանիկորեն չպետք է անել, այլ մաքսիմալ այնպես անել, որ տարբերություններն ու խտրականությունները մաքսիմալ վերացվեն. «Այստեղ աջակցություն է պետք ինչպես աշխատանքի և սոցիալական հարցերի, այնպես էլ առողջապահության նախարարության կողմից»: