Ձեր վստահելի աղբյուրը

ՀՀ գյուղատնտեսության նախարար Իգնատի Առաքելյանը վստահեցնում է, որ խաղողի մթերումներն ընթանում են իրենց հունով և այս պահին որևէ  խնդիր չկա:

«Կան դեպքեր, երբ մթերողները վճարումների հարցում են պայմանավորվում գյուղացիների հետ, որպեսզի ավելի ուշ վճարեն»,- այս մասին այսօր կառավարության նիստից հետո լրագրողների հետ զրույցում ասաց Իգնատի Առաքելյանը:

Նախարարը մանրամասներ ներկայացրեց նաև իր Մոսկվայի այցից: Ըստ նրա՝  այցի շրջանակներում որոշ շահագրգիռ ընկերությունների հետ քննարկել է հարցը, որ Հայաստանից խմիչքը արտահանվի մեկ բրենդի տակ:

«Այսօր շատ փոքր արտադրողներ տեխնիկական խնդիր ունեն ռուսական շուկա մտնելու: Ռուսաստանի խոշոր ցանցերն ուզում են մեծ քանակություն և կայուն որակ ու մատակարարում: Քննարկել ենք մեկ բրենդով դուրս գալու հարցը, որ այստեղ գործարաններին պատվեր տրվի և այնտեղ ցանցերին բաժանենք: Դա կնվազեցնի նաև այստեղի արտադրողների ռիսկերը»,- նշեց Իգնատի Առաքելյանը:

Նրա մոտեցմամբ՝ հայ արտադրողների կոնսոլիդացիան է պետք, որ համաձայնեն ու միասնական բրենդի տակ հանդես գան. «Եթե նրանք համաձայնեն, մենք պատրաստ ենք շարունակել այդ քննարկումները»:

Հարցին, թե օրինակ՝ «Պեռնո Ռիկար»- ը կհամաձայնի՞ հայկական բրենդի տակ հանդես գալ, Իգնատի Առաքելյանը պատասխանեց. «Ես չեմ ուզում այդ մասին խոսել, խոշոր ընկերությունները, որոնք ունեն իրենց շուկան, չեն համաձայնի, բայց ՓՄՁ-ները կհամաձայնեն: Ես փորձում եմ հեռանալ, դուք ինձ անընդհատ տանում եք  «Պեռնո Ռիկար»:

Պատասխանելով հարցին, թե այսօր լրանում է վարչապետի պաշոտնավարման մեկ ամիսը՝  ինչպես կգնահատի վարչապետի աշխատանքը, Իգնատի Առաքելյանը նշեց՝ «շատ բարձր», այնուհետև ավելացրեց. «Վարչապետի աշխատանքը գնահատողը ես չեմ, բայց այսօր կառավարությունն անում է մաքսիմալը և արագընթաց գործընթացի մեջ է»: