Ձեր վստահելի աղբյուրը

Երկու տարվա ընդմիջումից հետո ազգային կինոյի «Հայակ» մրցանակաբաշխությունը նախատեսվում է անցկացնել 2017-ին:

«Արդեն երկու տարի է մրցանակաբաշխությունը չի կայանում: Հիմնական խնդիրը ֆինանսավորումն էր:  Վերջին պահին հովանավորները հրաժարվում էին: Կարծում եմ՝ հաջորդ տարի  կանցկացնենք»,- Panorama.am-ի հետ զրույցում ասաց Հայաստանի Ազգային կինոկենտրոնի տնօրեն Գևորգ Գևորգյանը: 

Ըստ նրա, մրցույթում կընդգրկվեն 2015, 2016 թվականների ընթացքում նկարահանված ֆիլմերը:

Նա համոզված է,  որ «Հայակ» մրցանակաբաշխությունը  հայ կինոգործիչների համար ամենամեծ տոնն է: «Ոչ մի փառատոն չի կարող համեմատվել մրցանակաբաշխության հետ, քանի որ այն հայ կինոարտադրողի, կինոստեղծողի, արվեստագետի համար է՝ սկսած սցենարիստից մինչև մոնտաժող: Բոլորն արժևորվում են»,- ասաց Գ. Գևորգյանը:

Նա նաև նշեց, որ եթե մշտական հովանավոր ունենան, մրցանակաբաշխությունը կանցկացնեն ամեն տարի:

«Պետք է դեռ որոշենք՝ ամեն տարի անենք, թե երկու տարին մեկ: Կախված է հովանավորից: Իմ կարծիքով՝ ամեն տարին է ճիշտը: Գոնե հաջորդ տարի լավ անենք, հետո ընթացքում կմտածենք»,- հավելեց Գևորգ Գևորգյանը:

Ազգային կինոյի մրցանակաբաշխությունը հայ կինեմատոգրաֆիստների աշխատանքների ամենամյա ստեղծագործական բաց մրցույթ է: Ազգային կինոյի մրցանակաբաշխությունն ստեղծվել է ազգային կինոարտադրության խթանման ու զարգացման, նոր անունների բացահայտման, հայ հանդիսատեսին կինոթատրոններ վերադարձնելու, երկրի կինոգործիչներին համախմբելու, կինոարտադրության նոր նախագծերին օժանդակելու, ազգային կինոարտադրության լավագույն ավանդույթները պահպանելու նպատակով: «Հայակ» մրցանակաբաշխությունն առաջին անգամ անցկացվել է 2012 թվականին: