Ձեր վստահելի աղբյուրը

ՀՀ վարչապետ Կարեն Կարապետյանը այսօր Երևանում անցկացվող առաջին Եվրասիական գործընկերության միջազգային համաժողովում  շնորհակալություն հայտնեց ՌԴ տրանսպորտի նախարար Մաքսիմ Սոկոլովին Մոսկվա-Երևան ավտոբուսի վթարին  արագ արձագանքելու և հոգատարության համար:

«Շնորհակալություն եմ հայտնում Մաքսիմ Սոկոլովին և ի դեմս նրա՝ Ռուսաստանի կառավարությանն այն հոգատարության համար, որը նրանք ցուցաբերել են Բեսլանի ողբերգական դեպքերի ժամանակ: Շատ շնորհակալ եմ,  մենք անչափ զգացված ենք ձեր հոգատարությունից և վերաբերմունքից», - ասաց Կարեն Կարապետյանը:

Ավելի ուշ կառավարությունում վարչապետ Կարեն Կարապետյանի ու  ՌԴ տրանսպորտի նախարար Մաքսիմ Սոկոլովի հանդիպման ժամանակ վարչապետը նշել է, որ արդեն հանձնարարականներ է տվել համապատասխան գերատեսչությունների ղեկավարներին՝ տեղում իրավիճակը գնահատելու և անհրաժեշտ միջոցներ ձեռնարկելու վերաբերյալ:

Կառավարության հասարակայնության հետ կապերի վարչության հաղորդմամբ,  Մաքսիմ Սոկոլովը ՌԴ կառավարության անունից ցավակցություն է հայտնել Մոսկվա-Երևան ավտոբուսի ողբերգական վթարի հետևանքով զոհվածների ընտանիքների անդամներին ու հարազատներին և մանրամասներ ներկայացրել իրավիճակի և տեղում տարվող աշխատանքների վերաբերյալ: ՌԴ տրանսպորտի նախարարը հավաստիացրել է, որ ռուսական կողմն օպերատիվ կերպով անում է հնարավորը՝ վիրավորներին անհրաժեշտ բժշկական ու հոգեբանական օգնություն ցուցաբերելու ուղղությամբ: Նա տեղեկացրել է, որ վթարի հանգամանքները պարզելու նպատակով այնտեղ է գործուղվել նաև ՌԴ տրանսպորտի նախարարի տեղակալը:

Հիշեցենք, որ այսօր՝ հոկտեմբերի 14-ին, ժամը 04.30-ին (տեղական ժամանակով՝ 05.30-ին) ՌԴ ԱԻՆ ճգնաժամային կառավարման կենտրոնից տեղեկություն է ստացվել, որ Վլադիկավկազ-Բեսլան շրջանցիկ ավտոճանապարհի 8-րդ կմ-ին «Մերսեդես Բենց-0404-15R» մակնիշի 50 AA 515 պետհամարանիշի մարդատար ավտոբուսը Մոսկվա-Երևան երթուղին իրականացնելիս բախվել է «Սկանիա» մակնիշի բեռնատար ավտոմեքենային: Պատահարի հետևանքով զոհվել են 5 մարդ, վիրավորվել 27 ուղևոր: Տուժածները, այդ թվում` 4 երեխա, անմիջապես տեղափոխվել են Վլադիկավկազ քաղաքի տարբեր հիվանդանոցներ: Երեխաներից մեկի վիճակը  բժիշկների գնահատմամբ ծանր է: