Ձեր վստահելի աղբյուրը

Ռուսաստանը հանդիսանում է Հայաստանի տնտեսության մեջ հիմնական ներդրողը և 2016 թվականի  առաջին կիսամյակի տվյալներով՝ Հայաստանում ռուսական ներդրումներն արդեն հասել են 4,5 մլրդ դոլարի: Այս մասին այսօր Երևանում անցկացված  Եվրասիական գործընկերության միջազգային համաժողովում ասաց ՌԴ տրանսպորտի և կապի նախարար  Մաքսիմ Սոկոլովը:
Նրա խոսքերով՝ Հայաստանում գործում են 1250 ձեռնարկություններ կամ ռուսական կապիտալով դուստր կազմակերպություններ:

«Եվրասիական գործընկերության առաջին միջազգային համաժողովը հատուկ նշանակություն ունի  Ռուսաստանի և Հայաստանի համար: Որպես ՌԴ տրասպորտի նախարար հատուկ ուզում եմ նշել, որ Եվրասիական ֆորմատը լրացուցիչ հնարավորություններ է տալիս հայաստանյան ընկերություններին, որոնք կարող են օգտագործել  թե՛ ավտոտրանսպորտային, թե՛ երկաթուղային ճանապարհները ԵԱՏՄ երկրներում աշխատելու համար»,- ասաց Մաքսիմ Սոկոլովը:

Ըստ նրա՝ տարվում են աշխատանքներ Ռուսաստանը Հայաստանին կապող միակ ցամաքային ճանապարհով՝ Վերին Լարսով, բեռնափոխադրումները հեշտացված կարգով իրականացնելու ուղղությամբ: Նրա խոսքերով՝ նախորդ տարի առաջին անգամ այնտեղ սկսել է գործել առանձին ճանապարհագիծ՝ Եվրասիական միության երկրների ավտոմեքենաների համար:

Մաքսիմ Սոկոլովը նաև հայտնեց, որ ակտիվ համագործակցում են միասնական տրանսպորտային քաղաքականության ուղղությամբ: Նշեց նաև, որ Հայաստանի և Ռուսաստանի քաղավիացիաների միջև արդեն բաց երկնքի քաղաքականություն է գործում:

Նրա խոսքերով՝ համակարգված աշխատանք է տարվում նաև երկաթուղային փոխադրումների արդյունավետության բարձրացման ուղղությամբ:

«Վստահ եմ, որ մեր միասնական ջանքերը թույլ կտան լուծել ցանկացած հարց, որը կծառանա մեր առջև»,- ասաց ՌԴ տրանսպորտի նախարարը: