Ձեր վստահելի աղբյուրը

«Եթե սփյուռքի նախարարությունը տեղում լիներ, մենք ինչ գործ ունեինք այստեղ»,- լրագրողների հետ հանդիպմանն ասաց  նորաստեղծ «Հալեպահայե՛ր, մեզ բացակա չդնե՛ք» քաղաքացիական նախաձեռնության անդամ, տրածաշրջանային հարցերով փորձագետ - վերլուծաբան Սարգիս Հացպանյանը: 

Նրա խոսքով՝ Սիրիայում գրեթե վեց տարի պատերազմ է, սփյուռքի նախարարությունը Լաթաքիայում, Դամասկոսում, Հալեպում ոչ մի ներկայացուցիչ չունի:

«Սփյուռքի նախարարի երկու տեղակալները թող գնան Հալեպում ապրեն ու տեսնեն՝ ինչ վիճակ է այնտեղ, արդյոք մարդիկ կցանկանան մնալ այնտեղ: Եթե տեղում լիներ նախարարությունը, քաղաքացիական, հասարակական կազմակերպություններ պետք չէին լինի:  Այսօր հալեպահայերն ասում են՝ եթե իմանանք մեզ դիմավորող կա, մենք կգնանք: Ինչ է՝ ռումբը պետք է նախընտրեն հայրենիքից»,-  ասաց Ս.Հացպանյանը՝ ընդգծելով, որ համակարգման խնդիր կա: 

Վերջին օրերին ստեղծվել էր «Հալեպահայե՛ր, մեզ բացակա չդնե՛ք»  ֆեյսբուքյան էջը:

«Ֆեյսբուքյան էջի ծնունդը ինքնաբուխ եղավ: Չէի մտածում, որ այսքան մեծ արձագանք  է ունենալու: Մենք բացեցինք, որպեսզի այն լինի միջնորդ՝  նրանց միջև, ովքեր  պատրաստ են օգնություն ցուցաբերել հալեպահայերին և ովքեր օգնության կարիք ունեն: 5-6 օր է գործում է, արդեն 150-200 առաջարկություն է եկել հայաստանցիներից. մեկն առաջարկում է իր տունը, իր տան մեկ սենյակը, մյուսն առաջարկում է հագուստ, կոշիկ, ռուսերենի, արևելահայության ուսուցում»,- ասաց նախաձեռնության անդամ գրող, հրապարակախոս Նուշիկ Միքայելյանը:

Նա տեղեկացրեց, որ «Հալեպահայե՛ր, մեզ բացակա չդնե՛ք» քաղաքացիական նախաձեռնությունը հոկտեմբերի 15-ին ԳԱԱ Պատմության Ինստիտուտի նիստերի դահլիճում կազմակերպում է տեղեկատվական-խորհրդակցական հավաքույթ, լրիվ, օբյեկտիվ և բազմակողմանիորեն քննարկելու՝ հալեպահայության մշտական բնակության նպատակով ՀՀ տեղափոխման խնդիրներն ու գնահատելու՝ այդ առթիվ մինչօրս կատարված տարատեսակ աշխատանքները։