Ձեր վստահելի աղբյուրը

Խաղողի մթերման գործընթացը կարելի է համարել ավարտված: Այս մասին այսօր լրագրողների հետ հանդիպման ժամանակ ասաց Գինեգործների միության նախագահ Ավագ Հարությունյանը:

Ըստ նրա՝ 95%-ով ավարտվել է մթերման գործընթացը և, ցավոք սրտի, նախորդ տարվա համեմատ բերքը քիչ է: Նախնական տվյալներով՝ մթերվել է մոտ 105 հազար տոննա  խաղող, մթերման 1 կգ-ի միջին գինը կազմել է 115-117 դրամ:

Ավագ Հարությունյանը նշեց, որ նախորդ տարիների համեմատ այս տարի խաղողի մթերման հետ կապված լարվածություն գրեթե չկա, քանի որ բերքն է քիչ եղել: «Լարվածությունը թուլացել է, աստիճանաբար դուրս ենք գալիս ճգնաժամից: Նախորդ տարի խաղողի մթերման ժամանակ նման իրավիճակ ստեղծվեց այն պատճառով, որ բերքը շատ էր և գյուղացիներն ուզում էին բարձր գնով՝ 140-150 դրամով մթերել խաղողը, իսկ գործարաններին պարտադրվեց այդ գնով մթերել: Մինչդեռ  խաղողի գինն իրականում ցածր է»,- ասաց Ավագ Հարությունյանը՝ հավելելով, որ այս երկու գործոնների պատճառով ստեղծվեց այդ լարվածությունը:

Ըստ նրա՝  շուրջ 650  մլն դրամ դեռ վերամշակող ընկերւոթյունները նախորդ տարվանից  պարտք են գյուղացիներին, և 7-8 ամսվա ընթացքում այդ պարտքերը կմարվեն:

Գինեգործի խոսքերով՝ այս տարի ևս ընկերությունները խաղողը մթերել են պարտքով՝ բացառությամբ Երևանի կոնյակի գործարանի  և ևս երկու ընկերության:

«Վճարման մասով կա հստակ պայմանավորվածություն և հստակ գին: Դրա վճարման հետ կապված գործարաններն արդեն ազատության աստիճան չունեն: Կգա ժամանակը և պարտավոր կլինեն դա վճարել: Վերջնաժամկետ կա՝ սկսած երկու ամսից՝ մինչև դեկտեմբերի 31-ը՝ վերջացրած մեկ տարով»,- ասաց նա՝ հավելելով, որ այս տարի 10 ընկերություն ընդհանրապես խաղող չի մթերել:

Նշենք, որ հայկական ընկերությունները՝ հատկապես փոքր և միջին, հիմնականում արտահանման հետ կապված դժվարությունների առջև են կանգնում: Օրերս Մոսկվայում գյուղատնտեսության նախարար Իգնատի Առաքելյանը ռուս գործընկերների հետ քննարկել էր հայկական արտադրանքը մեկ միասնական բրենդով Հայաստանից արտահանելու հարցը:

Գինեգործների միության նախագահ Ավագ Հարությունյանի խոսքերով, միասնական բրենդով արտահանելու գաղափարին կողմ են մեծ թվով խոշոր ընկերություններ՝ բացառությամբ Երևանի Կոնյակի գործարանի, որը  դրա կարիքը չունի. «Մնացած բոլոր գործարանները համաձայն են մաս կազմելու ընդհանուր բրենդին, իսկ փոքր ընկերություններն ամբողջությամբ կողմ են դրան: Իմ կարծիքով՝ Հայաստանի ճանապարհը սա չէ, դա Հայաստանն ավելի կթուլացնի: Ընդհանուր բրենդը նշանակում է էժան ապրանք: Հայաստանի ճանապարհն էժան ապրանքի մեջ չէ: Ընդհանուր մի բան կսահմանեն, կառաջարկեն ամենաէժան գնով անդեմ մի բան, և մենք կլուծենք այսօրվա տնտեսական այս ցավոտ խնդիրները, բայց մենք առաջ չենք նայի»:

Գինեգործը կարծում է, որ խնդիրների լուծման համար հայեցակարգային մոտեցումներ են անհրաժեշտ, կառավարությունը պետք է գյուղացուն կարողանա ճիշտ ուղորդել՝ հետագա խնդիրներից խուսափելու համար:

Ինչ վերաբերում է նոր կառավարության մոտեցումներին, Ավագ Հարությունյանն ասաց, որ դրանք պարզ կլինեն, երբ ներկայացնեն գործունեության ծրագիրը: