Ձեր վստահելի աղբյուրը

«Այս խորհրդաժողովը Հայաստանի կիբեռանվտանգության ռազմավարական շահերի քաղաքական և տեխնոլոգիական կողմերի հատման որոնման տրամաբանական շարունակությունն է ինչպես ՀԱՊԿ-ի պետություններից դաշնակիցների, այնպես էլ ՆԱՏՕ-ի «Գործընկերություն հանուն խաղաղության» ծրագրի գործընկերների նկատմամբ ՀՀ փոխլրացման սկզբունքով արտաքին անվտանգային քաղաքականության համատեքստում»: Այսօր  Երևանում անցկացվող  ՀԱՊԿ անդամ երկրների տեղեկատվական անվտանգության ապահովման հարցերով համաժողովի ժամանակ հայտարարեց ՊՆ Պաշտպանական ազգային հետազոտական համալսարանի պետ, ՀԱՊԿ-ի գիտափորձագիտական խորհրդի անդամ Հայկ Քոթանջյանը: Նա նախագահում էր «ՀԱՊԿ-ի շահերից բխող տեղեկատվական անվտանգության ռազմավարության մշակման քաղաքական ու տեխնոլոգիական ուղենիշները» խորագրով նիստը:

Քոթանջյանն ընդգծեց՝  առաջնորդվելով ՀՀ արտաքին քաղաքականության բազմա-վեկտորության սկզբունքով, Պաշտպանական ազգային հետազոտական համալսարանի Ազգային ռազմավարական հետազոտությունների ինստիտուտը շարունակում է իր գիտափորձաքննական համագործակցությունը ինչպես Ռուսաստանի, այնպես էլ ԱՄՆ-ի առաջադիմական ակադեմիական կենտրոնների հետ, ինչպիսիք են օրինակ ԱՄՆ-ի Պաշտպանական ազգային համալսարանի տեղեկատվական ռեսուրսների կառավարման քոլեջը և Հարվարդի համալսարանի «Կիբեռանվտանգություն. Քաղաքականության և տեխնոլոգիաների խաչում» ծրագիրը:

«ԱՄՆ-ի և Ռուսաստանի Դաշնության միջև ծագած որոշակի քաղաքական-դիվանագիտական լարվածության պայմաններում ՀՀ ՊՆ Պաշտպանական ազգային հետազոտական համալսարանը հանդես է գալիս որպես այն ակադեմիական հարթակ¬ներից մեկը, որտեղ հաջողվում է  գիտափորձաքննական ձևաչափով կազմակերպել ռազմավարական ֆորումներ` պայթյունավտանգ տարածաշրջանի անվտանգային դինամիկայի առավել ակտուալ պրոբլեմները քննարկելու համար»,-նշեց Քոթանջյանը:

Ելույթի վերջում դոկտոր Քոթանջյանը հանդես է եկել 2017 թ. Երևանում «Կիբեռանվտանգության համակարգի ձևավորման գործում երկխոսության և համագործակցության հեռանկարները. քաղաքականության և տեխնոլոգիաների խաչում» թեմայով միջազգային ռազմավարական ֆորում կազմակերպելու առաջարկով:

Նա նշեց, որ իր ղեկավարած  Պաշտպանական ազգային հետազոտական համալսարանըպատրաստ է ֆորումի համատեղ կազմակերպման մասին առաջարկությամբ դիմել ՄԱԿ-ին, ՀԱՊԿ-ի ու ՆԱՏՕ-ի պետությունների գործընկեր ուղեղային կենտրոններին:

Համաժողովի ՀԱՊԿ  գլխավոր քարտուղար Նիկոլայ Բորդյուժայի անունից ողջունեց նրա տեղակալ Արա Բադալյանը: Նա շնորհակալություն հայտնեց հայկական կողմին՝ տեղեկատվական անվտանգության հարցերի վերաբերյալ պրոֆեսիոնալ քննարկումներ անցկացնելու բարենպաստ պայմաններ ստեղծելու համար:

Ընթացող աշխարհքաղաքական փոփոխությունների համատեքստում նա նշեց ինֆորմացիոն հիբրիդային պատերազմների կիրառումը, անկայուն դարձած աշխարհում ծայրահեղական գաղափարներ տարածման վտանգները:
«Ստեղծված իրավիճակում ՀԱՊԿ անդամ երկրների առաջնորդների առաջ խնդիր է դրված ամրապնդել փոխգործակցությունը՝ անվտանգ տեղեկատվական միջավայր ձևավորելու համար»,-ասաց նա:

Բադալյանի  ելույթն ամբողջությամբ՝ տեսանյութում:



Նշենք, որ խորհրդաժողովում ելույթներով հանդես են եկել նաև Ռուսաստանի Դաշնության անվտանգության խորհրդի աշխատակազմի տեղեկույթի և տեղեկատվական տեխնոլոգիաների ոլորտում անվտանգության ապահովման վարչության պետ Ս. Բոյկոն, Ղազախստանի Հանրապետության համակարգչային պատահարներին արձագանքման ծառայության պետ Ժ. Ժակուպովը, Ռուսաստանի Դաշնության անվտանգության դաշնային ծառայության տեղեկույթի և հատուկ կապի պաշտպանության կենտրոնի վարչության պետի տեղակալ Ի. Սավաստեեվը, Բելառուսի Հանրապետության Նախագահին առընթեր օպերատիվ – վերլուծական կենտրոնի բաժնի պետ Ա. Մատվեևը, ՀԱՊԿ-ի անդամ պետությունների այլ բարձրաստիճան պաշտոնյաներ և տեղեկատվական անվտանգության ոլորտի փորձագետներ: