Ձեր վստահելի աղբյուրը

Իրաքի զինված ուժերն այսօր առավոտյան սկսել են երկրի մեծությամբ երկրորդ քաղաքի՝ Մոսուլի, ազատագրման ռազմական օպերացիան:

Այս մասին հայտնում է «BBC»-ի ռուսական գործակալությունը:

Իրաքյան հրետանին սկսել է քաղաքի հրետանակոծումը, որը 2014թ-ից գտնվում է «Իսլամական պետություն» ահաբեկչական կազմակերպության հսկողության տակ:

Տարբեր տվյալներով՝ քաղաքում կարող է գտնվել 3.000-4.500 գրոհային:

Քաղաքի ուղղությամբ շարժվել է նաև զրահատեխնիկա: Բացի Իրաքի զինված ուժերից՝ Մոսուլի ազատագրմանը մասնակցում են նաև Իրաքյան Քրդստանի ռազմաօդային ուժերը, ինչպես նաև ԱՄՆ-ի գլխավորած կոալիցիոն ուժերի ավիացիան:

Իրաքի վարչապետ Հայդեր ալ Աբադին հայտարարել է, որ առավոտյան սկսված ռազմական գործողության շրջանակում «Իսլամական պետություն» ահաբեկչական խմբավորման ենթակայության տակ գտնվող 11 գյուղ արդեն հաջողվել է ազատագրել:

Փորձագետների կարծիքով՝ Իրաքի բանակի կողմից Մոսուլի ազատագրումը կարող է հանգեցնել «Իսլամական պետության» վերջնական ջախջախմանը, մյուս կողմից, հաշվի առնելով ռազմական օպերացիայի բարդության աստիճանը՝ ռազմագետները համարում են, որ գործողությունը կարող է տևել մի քանի շաբաթ:

Քաղաքի ազատագրման գործողությունը պլանավորվել է նախորդ մի քանի ամիսների ընթացքում: Հաշվի առնելով քաղաքի մոտ 1,2 մլն. բնակչության առկայությունը՝ ՄԱԿ-ը նախազգուշացրել է, որ գործողությունը կարող է հանգեցնել հումանիտար աղետի՝ կապված խաղաղ բնակչության շրջանում հնարավոր կորուստների հետ:

Հավելենք, որ մոսուլի գործողությունն ուղիղ միացմամբ լուսաբանվում է աշխարհի բազմաթիվ լրատվամիջոցների կողմից: