Ձեր վստահելի աղբյուրը

Հայաստանը Եվրոպական Միության անբաժանելի մասն է և լինելով առաջին քրիստոնյա պետությունը, լինելով եվրոպական քաղաքակրթության օրրանը, դարեր շարունակ ունեցել է սերտ կապեր Եվրոպայի հետ: Այդ մասին այսօր լրագրողների հետ հանդիպման ժամանակ հայտարարեց Հայաստանում ԵՄ պատվիրակության ղեկավար Պյոտր Սվիտալսկին` Եվրաակումբի բացման արարողության ժամանակ:

«Հայերը Եվրոպայում պետք է զգան ինչպես իրենց տանը ու պետք է զգան մեծ և ամբողջական Եվրոպայի ընտանիքի մի մասը: Ոմանք կարող են այսօր հարցնել՝ ի՞նչ է նշանակում եվրոպամետ լինել Հայաստանում: Եվրոպական ինքնությունը մի քանի չափորոշիչ ունի: Օրինակ՝ երիտասարդության համար եվրոպական ոգին կարող է նշանակել միշտ լինել ճշմարտության, ռացիոնալության կողմից», -հայտարարեց Սվիտալսկին:

Նրա խոսքով, Եվրաակումբի բացման նպատակը ՀՀ-ԵՄ հարաբերությունների, ՀՀ-ում Եվրամիության կողմից հայ երիտասարդներին տրվող հնարավորությունների մասին իրազեկելն է: Ծրագրի իրականացման համար ԵՄ-ն, ինչպես Սվիտալսկին ասաց, ծախսում է «խորհրդանշական գումար՝ մի քանի հազար եվրո»:

Սվիտալսկին ներկայացրեց, որ լինել եվրոպամետ, նշանակում է հավատալ օրենքի գերակայությանը, արդարադատության անկախությանը, դատարաններում բոլորի հավասարությանը, ժողովրդավարական գործընթացների ամրապնդմանը:

Հանդիպմանը ներկա «Անալիտիկոն» ամսագրի խմբագիր, արցախցի Գեղամ Բաղդասարյանը Սվիտալսկուն հիշեցրեց ԵՄ-ի «Ներգրավում առանց ճանաչման» ծրագրի մասին և հետաքրքրվեց՝ հնարավո՞ր է Արցախում ևս նման եվրաակումբ բացվի:

«Ժամանակին արցախյան մի շարք ՀԿ-ներ դիմել էին ԵՄ-ին եվրոպական տեղեկատվական կենտրոն բացելու առաջարկով», -դիմելով Սվիտալսկուն ասաց Բաղդասարյանը:

Ի պատասխան Հայաստանում ԵՄ պատվիրակության ղեկավարը տեղեկացրեց, որ Հարավկովկասյան տարածաշրջանում ԵՄ հատուկ ներկայացուցիչն այս շաբաթ այցելելու է Հայաստան և նրա մանդատի բաղադրիչներից մեկը Հայաստանի և Ադրբեջանի ժողովուրդների միջև փոխվստահության մթնոլորտի ձևավորումն է ու շփումների խթանումը:

«ԵՄ-ն հատկացրել է գումարներ Ադրբեջանի և Հայաստանի միջև վստահության ձևավորման ծրագրերի համար, և ես գիտեմ, որ դեսպան Զալբերը որոնելու է այդպիսի հնարավորություններ ծրագրեր իրականացնելու համար: Եվ ենթադրում եմ, որ նա ավելի պատրաստ կլինի պատասխանել ձեր հարցին: Իմ մանդատը չի տարածվում մինչև Ստեփանակերտ, Ղարաբաղ:  Բայց հույս ունեմ, որ առաջիկայում մենք կկարողանանք տեսնել համակողմանի կարգավորում», -հավելեց Սվիտալսկին: