Ձեր վստահելի աղբյուրը

Գաբրիել Սունդուկյանի անվան ազգային ակադեմիական թատրոնի «Ջոն արքա» ներկայացումը Թբիլիսիում կայացած «New» միջազգային թատերական փառատոնում մեծ հաջողություն է ունեցել:  Լրագրողների հետ հանդիպմանը Հայաստանի թատերական գործիչների միության քարտուղար Սոնա Մելոյանն ասաց, որ մեծ պատիվ է նման փառատոնին մասնակցելը:

«Բացառությամբ Մոսկվայի, նախկին ԱՊՀ տարածքում նման փառատոն չկա: Բյուջեն կազմում է 1 միլիոն դոլար»,- նշեց նա:

Ինչպես բոլոր մեծ ու հայտնի փառատոները, այս փառատոնն էլ մրցանակաբաշխություն չունի, ուղղակի ներկայացումների համաշխարհային «պանոռամա» է:

«Այն փաստը, որ «Ջոն արքա»-ն ընդգրկվել էր փառատոնի խաղացանկում, արդեն մեծ հաջողություն է, քանի որ անթիվ հայտեր էին ներկայացվել, ընդունվել էր արտասահմանյան  12 ներկայացում (իսպանական, ռուսական, ճապոնական, և այլն): Մեկը հենց մեր մայր թատրոնի  ներկայացումն էր»,- ասաց նա:

Փառատոնը կայացել է սեպտեմբերի 24-ից հոկտեմբերի 8-ը:

ՀՀ վաստակավոր արտիստ Արմեն Մարությանի խոսքով ևս՝ ներկայացումը շատ լավ է ընդունվել հանդիսատեսի կողմից:

«Տիգրան Գասպարյանն այնպես է բեմադրել, որ կարելի է խաղալ  և փոքրիկ սենյակում, և այգում, և «Գլոբուս» թատրոնում: Փառատոնի շրջանակում մեզ տրամադրել էին շատ լավ բեմ՝ 450 հանդիսականի համար էր թատրոնը: Շատ լավ ընդունվեց»,- ասաց դերասանը՝ հիշելով, որ երբ Սոնա Մելոյանը տեղեկացրել է այս ներկայացմամբ փառատոնին մասնակցելու իր ցանկությունը, ինքը թերահավատորեն է վերաբերել, թե այն կարող է ընդգրկվել  խաղացանկում: 

Ս. Մելոնյանն ասաց, որ ներկայացումից հետո փառատոնի համակարգողը մոտեցել է իրեն, փոխանցել հանդիսատեսի արձագանքը՝ գովասանքի խոսքերը, ասել. «Դուք այս ներկայացումով լրիվ կոտրեցիք մեր պատերացումները, ստերիոտիպը հայ թատրոնի մասին: Եթե նման ներկայացում լինի, մենք մեծ հաճույքով կշարունակենք համագործակցությունը»: