Ձեր վստահելի աղբյուրը

Այսօր Շենգավիթ վարչական շրջանի ընդհանուր իրավասության դատարանում դատավոր Դավիթ Բալայանի նախագահությամբ  շարունակվող ծննդկան Մերի Մարգարյանի և նրա նորածնի մահվան գործով դատական նիստում հետազոտվեցին Մերիի հիվանդության պատմության և նրա երեխայի բժշկական փաստաթղթերը:

Դրանք ծավալուն չէին, բայց, պարզվեց, շատ բարդ էին ու հետազոտելու համար մի քանի ժամ պահանջվեց:

Դատավոր Դավիթ Բալայանը հստակեցրեց, որ բժշկական փաստաթղթերի հետազոտումն արվում է, որպեսզի դրանք հետագայում համեմատեն դատարանում ցուցմունք տվող բժիշկների ու դատաբժշկական փորձաքննության եզրակացությունների հետ:

Փաստաթղթերի հետազոտության ընթացքում դատավոր Դավիթ Բալայանը բժիշկների հայերեն ձեռագրերն ընթերցելիս ժամանակ առ ժամանակ խնդիրներ էր ունենում, չէր կարողանում հասկանալ, և նրան օգնության էր հասնում այս գործով ամբաստանյալ, «Շենգավիթ» բժշկական կենտրոնի մանկաբարձ-գինեկոլոգ Շուշանիկ Բախշյանը:

Հիշեցնենք՝ 34.5 շաբաթական հղիություն ունեցող Մերի Մարգարյանը հուլիսի 23-ին դժգոհել է բարձր ջերմությունից ու թուլությունից, սակայն նրան հսկող «Շենգավիթ» բժշկական կենտրոնի մանկաբարձ-գինեկոլոգ Շուշանիկ Բախշյանը հորդորել էր խմել պարացետամոլ: Մերիի բարձր ջերմությունը շարունակվել է մինչև հուլիսի 26-ը և հենց այդ օրն էլ որոշվել է նրան հոսպիտալացնել:

Բախշյանը այսօրվա նիստում դատավորի խնդրանքով կարդաց ծննդկան Մերի Մարգարյանի հղիության վարման, ընդունման վերաբերյալ բժիշկների ներկայացրած ախտորոշումները: Մասնավորապես, ըստ բժշկական փաստաթղթերից մեկի, հուլիսի 27-ին Մերի Մարգարյանի վիճակը վատացել է, և նա պաոթլոգիայի բաժանմունքից տեղափոխվել է վերակենդանացման բաժանմունք:

Մերիի մարմնի ջերմության բարձրացումը շարունակվել է նաև հուլիսի 28-ին և երբ «Շենգավիթ»-ում տեսել են այլ ելք չկա, տեղափոխել են «Էրեբունի» բժշկական կենտրոն:

«Տեղափոխվել է ծանր վիճակում, գանգատվում է շնչարգելումից: 34.5 շաբաթական հղիություն: Անեմիա, պտղի ներարգանդային աճի դանդաղում և պետք է շտապ կատարել կեսարյան հատում: HELP սինդրոմ, պտղի դիստենս», -արդեն «Էրեբունի» ԲԿ-ում իր հղղին զննելուց հետո իր եզրակացության մեջ գրել է «Էրեբունու» փոխտնօրեն Անդրանիկ Պողոսյանը, որն էլ հենց վիրահատել է Մերիին: Վերջինի եզրակացությունը կարդաց Շուշանիկ Բախշյանը:

Մերիի վիճակի վատթարացման համար «Էրեբունի» բժշկական կենտրոնում նույնիսկ բժշկական կոնսիլիում է հրավիրվել, որին ներկա են եղել 7 մասնագետներ, այդ թվում ՀՀ գլխավոր գինեկելոգ Ռազմիկ Աբրահամյանը: Կոնսիլիումի եզրակացության համաձայն, Մերի Մարգարյանը եղել է շատ ծանր վիճակում, «մաշկը խիստ գունատ, աղիները չեն գործել, որովայնը շոշափելիս փափուկ է եղել, միզարձակումը բացակայել է»:

Դատավորը ասաց, որ կոնսիլիումին մասնակցած բժիշկներից շատերը՝ 4-ը չեն ստորագրել, իսկ երեքը, այդ թվում Ռազմիկ Աբրահամյանը ստորագրել են կոնսիլիումի եզրակացությունը:

Նկատենք, որ բժշկական փաստաթղթերի հետազոտության ժամանակ դատավոր Դավիթ Բալայանը զարմացավ, որ դրանցում կան ռուսերենով գրառումներ և մյուս ամբաստանյալ Անի Բաբելյանից, որը համեմատաբար երիտասարդ էր, հետաքրքրվեց, թե երբ է ավարտել ուսումնական հաստատությունը:

Վերջինը պատասխանեց, որ ավարտել է 2008-ին: Դատավորի մյուս հարցին, թե ինքն է՞լ է բժշկական փաստաթղթերը լրացնում ռուսերենով, Բաբելյանը պատասխանեց. «Հիմնականում այո»:

Զրույցին միջամտեց Բախշյանի փաստաբան Ալեքսանդր Սիրունյանը. «Բժշկության միջազգային լեզուն ռուսերենն է»: «Հնդիկներն էլ են ռուսերեն գրում», - ի պատասխան հեգնեց դատավոր Բալայանը:

Բժշկական փաստաթղթերի հետազոտությունից հետո որոշվեց սկսել գործով որպես վկա անցնող բժիշկների հարցաքննությունը: Հաջորդ դատական նիստում, որը կկայանա հոկտեմբերի 25-ին, կհարցաքննվեն 4 բժիշկներ: Այս գործով վկա են 8 բժիշկներ:

Այս գործով, հիշեցնենք, ամբաստանյալներ են «Շենգավիթ» բժշկական կենտրոնի մանկաբարձ-գինեկոլոգներ Շուշանիկ Բախշյանն ու Անի Բաբելյանը, որոնք մեղադրվում են հղի Մերի Մարգարյանին ոչ պատշաճ բուժօգնություն ցուցաբերելու համար (ՀՀ Քրեական օրենսգիրք 130-րդ հոդվածի 2-րդ մաս):

Մեղադրանքը պաշտպանող դատախազը ավելի վաղ դատական նիստում ներկայացրել էր երկու ամբաստանյալների մեղադրական եզրակացությունը: Ըստ այդմ, Շուշանիկ Բախշյանը, որը հղի Մերի Մարգարյանի հղիությունը վարող բժշկուհին է եղել, մեղադրվում է այն բանի համար, որ «իր մասնագիտական պարտականությունների նկատմամբ անփույթ և անբարեխիղճ վերաբերմունքի հետևանքով դրանք իրականացրել է ոչ պատշաճ, որն անզգուշությամբ առաջացրել է բուժվող հիվանդի` Մերի Մարգարյանի, այնուհետև` նորածնի մահը»: Նույն արարքի համար է մեղադրվում նաև մյուս ամբաստանյալը՝ նույն բժշկական կենտրոնի մանկաբարձ-գինեկոլոգ Անի Բաբելյանը: