Ձեր վստահելի աղբյուրը

Բեռնատարը, որին բախվել էր Մոսկվա-Երևան երթուղու ավտոբուսը, կայանված է եղել ճանապարհից դուրս: Այս մասին այսօր լրագրողների հետ հանդիպման ժամանակ ասաց ՀՀ տրանսպորտի, կապի եւ տեղեկատվական տեխնոլոգիաների փոխնախարար Արամ Արսենյանը:

Նշենք, որ նա վթարից հետո եղել է դեպքի վայրում:

«Այսինքն՝ ճանապարհային երթևեկության կանոնների խախտմամբ չի եղել այդ կայանումը, և նախնական վարկածը, որ հնարավոր է բեռնատարի ոչ ճիշտ կայանումն է եղել վթարի պատճառը՝  կարելի է բացառել:  Գոնե այդպես ինձ հաղորդեց քննիչը»,- նշեց Արամ Արսենյանը:

Նրա խոսքերով՝ ինքը բազմիցս կապ  է հաստատել հետաքննությունը վարող քննիչի հետ և, ինչպես իրենց են հայտնել, մեքենան կայանած է եղել ճանապարհից դուրս:

Ինչ վերաբերում է վարորդի քնած լինելու վարկածին, փոխնախարարն ասաց, որ մինչև քննությունը չավարտվի, ոչինչ չեն կարող ասել:

«Ինձ հետաքննիչը խնդրեց հապշտապ  որևէ հայտարարություն չանել, վարկածներ չհնչեցնել, սպասենք պաշտոնական հետաքննության ավարտին, որից հետո արդեն պարզ կլինի»,- ասաց Արամ Արսենյանը: 

Ճշտող հարցին, թե այս պահին ի՞նչ նախնական վարկածներ են քննվում, փոխնախարարը պատասխանեց. «Բոլոր վարկածներն էլ շրջանառության մեջ են քննիչի կողմից:  Դա կարող է լինել և մեքենայի տեխնիկական անսարքությունը, և մարդկային գործոնը, և վարորդի առողջական վիճակը»:

Դիտարկմանը, թե տեղեկություններ կան՝ վարորդը առողջական խնդիրներ ունեցե՞լ է, թե ոչ, Արամ Արսենյանն ասաց, որ իրենք առայժմ պաշտոնական  փաստաթուղթ չեն ստացել:

ՀՀ առողջապահության փոխնախարար Վահան Պողոսյանն էլ անդրադառնալով տուժածների առողջական վիճակին՝ նշեց, որ  Ռուսաստանի Դաշնությունում բուժում ստացող 4 հիվանդներից մեկի վիճակը ծանր է, մյուս երկուսն էլ տեղափոխվել են այլ քաղաք` վիրահատության:

Նշվեց նաև, որ ավտոբուսի երկրորդ վարորդը, որն ունի աչքի վնասվածք,   կնոջ հետ գտնվում է Վլադիկավկազում:

«Տեղի հայ համայնքը նրանց մասին հոգ է տանում: Գիշերը նրանց կճանապարհեն և Հայաստանի սահմանին հասնելուն պես վարորդին  շտապօգնության ավտոմեքենայով կտեղափոխեն Սուրբ Գրիգոր Լուսավորիչ հիվանդանոց` բուժումը շարունակելու նպատակով»,- ասաց փոխնախարարը: