Օտարերկրյա կինոարտադրողների համար կարևոր է, որ երկիրն ունենա «Կինոյի մասին» օրենք. Գևորգ Գևորգյան

Մշակույթ 20:36 19/10/2016 Հայաստան

«Կինոյի մասին» օրենքի նախագիծը պատրաստ է, շրջանառության մեջ է: Քանի որ հաստատված չէ, օրեր առաջ մշակույթի նոր նախարար Արմեն Ամիրյանը հավաքել էր կինոգործիչներին՝ ևս մեկ անգամ քննարկելու նախագիծը,- Panorama.am-ի հետ զրույցում ասաց Հայաստանի Ազգային կինոկենտրոնի տնօրեն Գևորգ Գևորգյանը:

Նրա ներկայացմամբ, օրենքի նախագծով առաջարկվում է ցուցադրել հավաստագիր ունեցող կինո, ֆիլմերն ազատել ավելացված արժեքի հարկից, նաև օտարերկրյա կինոներդրողին 20 տոկոսի չափով ազատել ավելացված արժեքի հարկից, և այլն:

«Ամենակարևորն այն է, որ անկախ նրանից, թե այս օրենքը շատ մեծ արտոնություններ կտա, կամ չի տա, միայն այն, որ Հայաստանը կունենա նման օրենք, արդեն մեծ բան է, դրական ցուցանիշ է: Մենք մեծ կապեր ունենք արտասահմանյան տարբեր կառույցների, կինոֆոնդերի հետ, տարբեր երկրների հետ համատեղ ֆիլմեր ենք անում: Երբ նախագիծը հավանում են, թեման իրենց համար ընդունելի է, ուզում են իմանալ՝ արդյոք երկիրն ունի կինոյի մասին օրենք, այսինքն հաստատագրված է երկրի մասնակցությունն օրենքով, պետությունն ունի կինոն պաշտպանող օրենք»,- ասաց Գ. Գևորգյանը՝ հավելելով, որ այսքան տարիներ բավականին մեծ դժվարությունների էին հանդիպում համատեղ ֆիլմարտադրության հարցերում հենց օրենքի բացակայության պատճառով:

Ազգային կինոկենտրոնի տնօրենի խոսքով՝ օրենքի առկայությունն արդեն երաշխիք է, որ շատ պրոդյուսերական ընկերություններ Հայաստանի հետ ազատ փոխհարաբերությունների մեջ կմտնեն:

Դեռևս պարզ չէ, թե երբ նախագիծը վերջնական տեսքով կներկայացվի կառավարության հաստատմանը, որից հետո էլ կուղարկի Ազգային ժողով:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: