Ձեր վստահելի աղբյուրը

«Հայաստանում գործում է 18 դեղարտադրող կազմարություն, որից երեքը սերտեֆիկացված են  որպես  պատշաճ  արտադրական գործունեություն ծավալող արտադրություններ»,- Ազգային ժողովի արտահերթ նիստում «2015 թվականի դեկտեմբերի 2-ին Մոսկվայում ստորագրված «Հայաստանի Հանրապետության` «Եվրասիական տնտեսական միության շրջանակներում դեղամիջոցների շրջանառության միասնական սկզբունքների և կանոնների մասին» 2014 թվականի դեկտեմբերի 23-ի համաձայնագրին միանալու մասին» արձանագրության վավերացման հարցի քննարկմանն ասաց  ՀՀ առողջապահության նախարարի տեղակալ Սերգեյ Խաչատրյանը:

Ըստ նրա, այդ ընկերությունները լայն հնարավորություններ ունեն իրենց արտադրանքն արտահանելու ոչ միայն ԵԱՏՄ շուկա, նաև Մերձավոր Արևելիք շուկաներ, ԵՄ երկրներ:

«Հայաստանի շուկայի ընդամենը 4 տոկոսն է ծածկվում տեղական արտադրության դեղամիջոցներով, մնացած ամբողջը ներկրման ճանապարհով է գալիս Հայաստան»,- ասաց  փոխնախարարը:

Ս. Խաչատարյանի ներկայացրած տվյալների համաձայն՝ արտահանման տեսակետից վերջին  տաս տարվա ընթացքում դեղագործական ինդուստրայի աճ է նկատվում միջինը 18 տոկոս, իսկ 2015-ին այդ աճը կազմել է 25 տոկոս:

«Անուղղակիորեն կապում ենք ԵԱՏՄ անդամակցության հետ: Այս առումով մեր արտադրողներն արտահանելու ավելի մեծ հնարավորություններ ունեն»,- նշեց առողջապահության փոխնախարարը:

Խոսելով դեղերի գների մասին,  նա ասաց, որ դեկտեմբերից ուժի մեջ մտնող օրենքում առանձին գլխով հաստատել են,  որ անցումային փոլում՝ 2017-ին, մշակելու են մեթոդաբանություն, որով սահմանվելու են առավելագույն գներն այն դեղամիջոցների  համար, որոնք պետական բյուջեի միջոցներով ձեռք է բերում միան ՀՀ առողջապահության նախարարությունը: Ըստ Ս.Խաչատրյանի,  ժամանակի ընթացքում նույն մեթոդանաբանությունը տարածելու են նաև պոլիկլինիկաների և հիվանդանոցների կողմից պետական միջոցներով ձեռք բերվող դեղամիջոցների վրա:

Բացի այդ, նա նշեց, որ այս պահին բանակցություններ են վարում դեղարտադրողների, դեղամիջոցներ ներկրողների հետ՝ քննարկելու կիրառվող գնագոյացման մեխանիզմները, ցույց են տալիս  Հայաստանի և այլ շուկաների, այդ թվում նաև ՌԴ, Վրաստան,  միջև եղած գների տարբերություները:

«Փորձում ենք այդ գներն իջեցնել: Հասկանալի է, որ բավարար չէ, բայց անհրաժեշտ է այս էտապում անել այդ քայլերը՝ մինչև գների կարգավորման օրենսդրական կարգավորումներ ունենանք»,- ասաց Ս. Խաչատրյանը: