Ձեր վստահելի աղբյուրը

Այսօր Ազգային ժողովում կառավարության գործունեության ծրագրի ներկայացումից հետո, պատգամավոր Խաչատուր Քոքոբելյանը դիմելով վարչապետ Կարեն Կարապետյանին՝ ասաց, թե համաձայն է ծրագրում ներկայացված կետերի հետ, սակայն  ծրագրում պետք է հստակ նշված լիներ, թե ինչպես են պայքարելու  ստվերի ու մենաշնորհների դեմ՝ հատկապես, որ վարչապետը նախկինում նշել է՝ առանց ստվերի կրճատման և մենաշնորհների վերացման հնարավոր չէ երկրում առաջընթաց ապահովել:

«Հասկանում եմ, որ շատ դժվար է քաղաքական փաստաթղթում ներառել և պաշտոնապես ընդունել, որ Հայաստանում ստվեր կա, բայց այդ համարձակ մոտեցումները մենք ակնկալում էինք: Չե՞ք կարծում, որ ծրագրում պետք է հստակ արտացոլվեն  ստվերի և մենաշնորհների կրճատման ուղղությամբ կիրառվող մեխանիզմները»,- նշեց Խաչատուր Քոքոբելյանը:

Կարեն Կարապետյանը պատասխանեց. «Իմ կարծիքով՝ հիմնական մասը մեր ծրագրի հենց դրա մասին է: Երբ ասում ենք ՝ արդար, պարզ, մրցունակ, հավասար պայմաններ, այդ պայմաններում մոնոպոլիաները, գերիշխող դիրքերը կայանում են   օբյեկտիվորեն կամ չեն կայանում, երբ ասում ենք՝ օրինապահ բիզմեսմենը պետք է իրեն զգա ապահովված, ոչ օրինապահը՝ ոչ, ծրագիրը հենց դրան է ուղղված»:

Վարչապետի խոսքերով՝ ավելի մանրամասն ներկայացնելը կլիներ անտրամաբանական և շատ ընթերցելի: 

Խաչատուր Քոքոբելյանը արձագանքեց՝ ասելով, որ ակնհայտ է՝  թափանցիկ կառավարումը բերելու է դրան. «Խոսքն այլ բանի մասին է: Օրինակ՝ անընդհատ խոսվում է, որ Հայաստանում ռեսուրս չկա, իսկ Հայաստանում մեծ ռեուրս կա, ստվերը հարկային դաշտ բերելը, որ 30 տոկոսից ավելի է, արժեր, որ այս քաղաքական փաստաթղթում ներկայացվեր դրա դեմ պայքարի մանրամասները, այդ թվում՝ թվերով ու գնահատականներով»:

Վարչապետն էլ նշեց, որ իրենք թվեր չեն ներկայացրել, այլ գրել են, որ տնտեսության ներուժը գնահատելու,  վիճակագրական տվյալների ախտորոշման անհրաժեշտություն ունենք. «Մենք այսօր ռեալ մեր հիվանդություններին, մեր վիճակին դիագնոս տալու անհրաժեշտություն ունենք: Բոլորը մնացած ենթադրությունները, որ այդ դիագնոսի վրա վստահ չենք, կլինեն օդից, ու վաղը մյուս օր կսկսենք արդարանալ, որ ինչու այսպես կամ այնպես չէ: Գուցե պետք է գրեինք, որ ստվերի դեմ պայքարի համար պետք այս կամ այն անել, բայց եթե դուք ունեք առաջարկություններ, թե ստվերի դեմ ինչպես պայքարենք, ապա մենք կլսենք ձեր առաջարկությունը»: