Ձեր վստահելի աղբյուրը

«Ինձ հրավիրել է վարչապետ աշխատել Սերժ Սարգսյանը, և ես նրան շատ հարգալից եմ վերաբերվում», -այսօր ԱԺ-ում կառավարության ծրագրի ներկայացման ժամանակ պատասխանելով պատգամավոր Նիկոլ Փաշինյանի հարցին, հայտարարեց վարչապետ Կարեն Կարապետյանը։

Պատգամավորը հետաքրքրվում էր Կարապետյան-Սարգսյան հարաբերություններից։ Նաև հարցրեց, թե ինչպե՞ս է վարչապետը վերաբերվում մոնոպոլիաներին, ոնց է պայքարելու դրանց դեմ։

«Սամվել Ալեքսանյանի մոնոպոլիան օրինակա՞ն է ձևավորվել, թե՞ ոչ օրինական: Միհրան Պողոսյանի անվան հետ կապվող բանանի ներկրման մենաշնորհը օրինակա՞ն է, թե՞ ոչ օրինական», -հետաքրքրվեց պատգամավոր Փաշինյանը։

«Ո՞նց եմ պայքարելու Սամվել Ալեքսանյանի, Միհրան Պողոսյանի և այլոց մոնոպոլիաների դեմ, շատ պարզ՝ խաղի կանոները լինելու են բոլորի համար նույնը։ Իսկ թե ո՞նց են նրանց մոնոպոլիաները առաջացել, այս պահին, ճիշտն ասած, ինձ հետաքրքիր չի։ Բայց ասեմ՝ լինելու է բաց դաշտ, ով այդ ոլորտում կլինի հաջողակ, ժամանակը ցույց կտա», -պատգամավորին արձագանքեց վարչապետը։

Պատգամավորի մոտ հարց առաջացավ. «Այսինքն Հովիկ Աբրահամյանի պաշտոնավարման տարիներին դաշտը փա՞կ է եղել»։

Ի պատասխան Կարեն Կարապետյանը նկատեց, որ չի բացառում, որ նախկինում «ադմինիստրատիվ միջամտություն եղել է»։