Ձեր վստահելի աղբյուրը

Ազգային ժողովում Կառավարության ծրագրի քննարկման ժամանակ ԲՀԿ խմբակցության պատգամավոր Գուրգեն Արսենյանը նշեց, որ ծրագրի նախաբանում գրված է՝ ՀՀ քաղաքացին հանդիսանում է բարձրագույն արժեք, և կառավարությունն իր գործունեության ընթացքում փորձելու է պաշտպանել քաղաքացու արժանապատվությունը, պաշտպանվածությունը, կենսամակարդակի բարձրացումը, լավատեսությունը ապագայի նկատմամբ, արդար հասարակության մեջ ապրելը:

«Արձանագրել եք, թղթի վրա գրել եք, չմոռանաք սա: Ի տարբերություն նախորդ կառավարությունների ծրագրերի, որոնցում այսպիսի արժեքներ հռչակված չէին, քանի որ նախորդ կառավարությունները հայ քաղաքացուն դիտարկում էին որպես արտահանման ենթակա ապրանք: Առաջին անգամ է, որ կառավարության գործունեության ծրագրում հանդիպում եմ այսպիսի ձևակերպում: Չմոռանաք սա»,- նշեց պատգամավորը:

Գուրգեն Արսենյանը կառավարության ծրագիրը հավակնոտ գնահատեց և հարցրեց՝ ունե՞նք այդքան ռեսուրս, որ իրականացվի այն, ինչ գրված է ծրագրում:

Վարչապետ Կարեն Կարապետյանն ասաց՝  իրականում համարում է, որ ձևակերպել են բավականին ծանր ծանրաձող. «Գիտակցաբար ենք գնացել նման ծանրաձող ձևակերպելուն, որպեսզի մոտիվացիան մաքսիմալ լինի և նույնիսկ ներսում պայմանավորվել ենք, որ եթե ծրագիրն ընդունվի, հաջորդ օրն արդեն կառավարության անդամները պետք է գործի անցնեն: Մեր ուժերը բավարա՞ր են, թե՞ ոչ… մենք ուրիշ տարբերակ չունենք»:

Կարեն Կարապետյանը նշեց նաև, որ գիտակցում է՝ բիզնեսը կարող է զգուշություն ցուցաբերել՝ մտածելով, որ առջևում ընտրություններ են, սպասենք տեսնենք ընտրություններից հետո ինչպես կլինի. «6-7 ամսվա մեջ բիզնեսը հաջորդ օրը սառը դուշ կընդունի և ոգեւորված կսկսի՞ աշխատել՝ չգիտեմ: Հույս ունե՞մ՝ երևի»:

«Ոչ իրագործելի ծրագիր չենք գրել, պոպուլիզմով չենք փորձել զբաղվել, եթե չիրագործենք, դա կլինի մեր աշխատանքի գնահատականը»: «Բայց որ նշաձողը շատ բարձր ենք դրել, դա այդպես է»,- եզրափակեց Կարեն Կարապետյանը: