Ձեր վստահելի աղբյուրը

ՀՀ վարչապետ Կարեն Կարապետյանը գործադիրի այսօրվա նիստում անդրադարձավ նաև Դատական ակտերի հարկադիր կատարման ծառայության գործունեությանը՝ նշելով, որ տևական ժամանակ է, ինչ բնակչության շրջանում դժգոհություններ են առաջանում ԴԱՀԿ գործունեությունից:

Նա նշեց, որ դրանք, մասնավորապես, առնչվում են ճանապարհային երթևեկության կանոնների խախտման համար վարչական տույժերի հարկադիր կատարման ընթացքում առաջացած խնդիրներին:

«Օրինակ, քաղաքացուն չեն ծանուցել վարչական ակտի մասին, բայց իր դրամական միջոցներն արգելանքի են վերցվում կամ գույքի վրա արգելանք է դրվում: Հանձնարարում եմ Արդարադատության նախարարին, առաջինը, ձեռնարկել բոլոր անհրաժեշտ միջոցները, որպեսզի կատարողական վարույթը հարուցվի միայն այն դեպքում, եթե ամբողջովին պահպանված են օրենքով նախատեսված պահանջները: Երկրորդ, եռամսյակը մեկ ամփոփել և տեղեկություն ներկայացնել, թե որ մարմիններն են կատարման ակտեր ներկայացնում՝ չպահպանելով օրենսդրության պահանջները: Երրորդ, մեկամսյա ժամկետում ներկայացնել առաջարկություն հարկադիր կատարողի կողմից պարտապաններին՝ վերջիններիս գույքի վրա արգելանք դնելու մասին անհապաղ ծանուցումն ապահովելու համար անհրաժեշտ մեխանիզմների ստեղծման մասով՝ էլփոստի միջոցով, sms և այլն»,- նշեց վարչապետը:

Կարեն Կարապետյանը կառավարության աշխատակազմի ղեկավար-նախարար Դավիթ Հարությունյանին էլ հանձնարարեց միասին քննարկել նախորդ հանձնարարականների կատարման իրավիճակը, կարգապահությունը և կատարման բովանդակությունը: