Ձեր վստահելի աղբյուրը

ԱԺ պատգամավոր Թևան Պողոսյանն այսօր Ազգային ժողովում Կառավարության ծրագրի ներկայացման ժամանակ վարչապետ Կարեն Կարապետյանին հարցրեց,  թե կառավարության ծրագրում ինչո՞ւ ոչ մի տեղ նշված չէ «հանրային շահ» հասկացությունը:

«Ամբողջ ծրագրում չգտա որևէ բառակապակցություն, ինչը թույլ կտար ինձ ընկալել, որ հանրային շահի գիտակցում կա: Ինչո՞ւմն է խնդիրը, ինչո՞ւ է հանրային շահ երևույթը կորել, հանրայինի գաղափարը կորել»,- ասաց պատգամավորը:

Թևան Պողոսյանին նաև հետաքրքրում էր, թե ի՞նչն է դրդել  կառավարությանը, որ ցանկանում է ինքը ձևավորել որևէ ռազմավարական կենտրոն այն դեպքում, երբ 25 տարվա ընթացքում Հայաստանում զարգացել են քաղաքացիական հասարակության տարբեր ինստիտուտներ, և որակի առումով, ըստ նրա,  շատերի արած ծրագրերն ավելի բարձր են, քան շատ ու շատ պետական մարմինների կողմից իրականացված ծրագրերը։ 

«Ինչո՞ւ եք հիմա նորն ուզում ձևավորել, այն էլ՝ հանրային գումարներով: Մի կողմից՝ ասում եք, որ պետք է ամեն ինչ բաց լինի, մյուս կողմից՝ ինչ-որ սեփական մարմին եք ձևավորում, ո՞րն է խնդիրը»,- հարցրեց պատգամավորը։

Պատասխանելով առաջին հարցին՝  վարչապետ Կարեն Կարապետյանն ասաց, որ գուցե «հանրային շահ» բառակապակցությունը չկա, բայց փոխարենը նշված է արժանապատվության, աղքատության նվազեցման, պաշտպանվածության և այլնի մասին։

Ինչ վերաբերում է ռազմավարական նախաձեռնությունների կենտրոն ստեղծելու մասին հարցին, վարչապետը նշեց, որ, եթե գոյություն ունեն  նման ռազմավարական կենտրոններ, կառավարությունը մեծ ուրախությամբ իրենց պրոդուկտը կվերցնի և կիրագործի։ 

«Եթե մեր երկրում կան նման ռազմավարական ինստիտուտներ, որոնք տվել են կիրառական պրոդուկտներ կամ կարող են տալ, մենք մեծ սիրով կվերցնենք դա։ Մենք դա ստեղծում ենք՝ այս պահին չունենալով որևիցե ռազմավարական ստրատեգիա: Ընդհանուր ունենք, բայց թուղթ ու գրիչով ձևակերպված չունենք։ Եթե դուք ունեք նման բաներ, մենք սիրով կքննարկենք ձեզ հետ»։

Թևան Պողոսյանն արձագանքեց. «Զարմանալի է, որ այսօրվա դրությամբ թե Աշխատանքի և սոցիալական հարցերի, թե Առողջապահության նախարարությունները չեն նշում մի քանի կենտրոնի աշխատանքներ: Օրինակ՝ 2015-16 թթ. հղիության արհեստական ընդհատումների դեպքերի կրճատման արդյունքում ծնվել է 1400 երեխա։ Կան կենտրոններ, որոնք հակակոռուպցիոն խորհրդին օգնել են պատրաստել ամբողջ համակարգային փոփոխության մոտեցումը, ծրագրեր են տրամադրել։ 

Իսկ հանրային շահի մասով՝  նշելով, կամ կարդալով՝ պետություն, կամ մասնավոր հիմնադրամ, ինձ մոտ հասկացվում է, որ կան մի խումբ մարդիկ, որոնց մոտ այդ փոքրիկ խմբի շահն է կարևոր»։

«Շատ լավ, պարոն Պողոսյան, այն, ինչ դուք ասում եք, դա էլ է ռազմավարական նախաձեռնություն, բայց մենք այստեղ նկատի ունեինք՝ բարեփոխումներ՝ ըստ ոլորտների, թե երկիրն ուր է գնալու։  Կրկնում եմ՝ պատրաստ ենք լսել ձեր առաջարկությունները։ Պետության և մասնավորի մասին երբ խոսում ենք, որևէ անձնական կամ մի խումբ մարդկանց շահերի մասին չենք խոսում։ Հիմնադրամի, ձևավորվող բյուջեի մասին ընդհանրապես չենք խոսել»,- ասաց Կարեն Կարապետյանը:

Մանրամասները՝ տեսանյութում: