Ձեր վստահելի աղբյուրը

«Երեկ հանդիպել եմ կարտոֆիլագործների հետ, խնդիրն այնքան էլ այնպես չէ, ինչպես ներկայացվում է»,- այս մասին այսօր կառավարությունում լրագրողների հետ զրույցում ասաց ՀՀ գյուղատնտեսության նախարար Իգնատի Առաքելյանը՝ անդրադառնալով կարտոֆիլի գնման ցածր գների վերաբերյալ հայտարարությանը:

Հիշեցնենք, որ Ազգային ժողովում պատգամավոր Նիկոլ Փաշինյանը հայտարարել էր, որ օրեր առաջ Վարդենիսի բնակիչները  փակել էին Վարդենիս-Երևան ավտոմայրուղին՝  պնդելով, որ պաշտպանության նախարարության մատակարարները գերշահույթներ են ստանում, մասնավորապես, ՊՆ կարտոֆիլը հանձնվում է 1 կգ-ը 80-104 դրամով, մինչդեռ կարտոֆիլը  գյուղացիներից ձեռք են բերում ցածր գնով՝  40-45 դրամով:

«Կան միջնորդներ, որոնք գնում են ցածր գնով, և առաջարկ է արվել, որպեսզի ֆերմերներն իրենք միանան, ստեղծեն իրենց միավորումը և իրենք մատակարարեն պաշտպանության նախարարությանն ավելի բարձր գնով, ինչին որոշ ֆերմերներ ասել են՝ եթե այդպես լինի, դա իրենց  ձեռք չի տա, քանի որ չեն  տեղավորվի այդ գների մեջ: Բոլոր դեպքերում մարզպետը և գյուղապետերը կաշխատեն, որպեսզի օգնեն ֆերմերներին  միանալ և իրենք ներկայացնեն իրենց գինը»,- ասաց  Իգնատի Առաքելյանը:

Անդրադառնալով գյուղատնտեսության ոլորտում ապահովագրության ներդրմանը՝ նախարարը նշեց, որ նման առաջարկ ներկայացվել է կառավարությանը և քննարկվում է. «Այստեղ պետք է համամասնորեն մասնակցություն լինի՝ կառավարություն և գերմանական բանկ: Եթե հավանություն լինի, անպայման պիլոտային տարբերակ կներդրվի»: