Ձեր վստահելի աղբյուրը

«Ինչո՞ւ են ներդրումները ֆանտաստիկ ցածր, ո՞րն է այն հիմնական գործոնը, որ Հայաստանում ներդրումները շատ-շատ քիչ են», -այսօր Ազգային ժողովում կառավարության ծրագրի ներկայացման ժամանակ Հայաստանի վարչապետ Կարեն Կարապետյանին հարցրեց ԱԺ «Բարգավաճ Հայաստան» խմբակցության անդամ Միքայել Մելքումյանը։

Ի պատասխան, վարչապետն ասաց, որ ներդրումները Հայաստան չեն գալիս բազմաթիվ պատճառներով.

«Երկրի փոքրություն, լոգիստիկ դաշտ, հարկային-մաքսայինի ոչ մինչև վերջ հասկացում։ Բազմաթիվ են այդ պատճառները։ Ո՞րն է առաջինը, ո՞րն է երկրորդը...երևի մեկ բառով ասենք՝ փող դնելու ռիսկայնությունը բարձր է. Աշխարհաքաղաքական վիճակը, պատերազմի վտանգը և այլն»։

Ըստ վարչապետի, Հայաստանում բիզնես միջավայրը «բավականին հուսահատված է ու չոգևորված»։

«Ես բիզնես միջավայրի հետ հանդիպել եմ և ժողովրդական լեզվով ասած՝ մեծ կրակ չեմ տեսնում։ Այդ պատճառով մենք՝ կառավարությունս, ասում ենք, որ ստեղծելու ենք ներդրումային հիմնադրամ, որպեսզի այդ պրոցեսին աջակցենք ու կատալիզատորի ֆունկցիա կատարենք», -հավելեց Կարապետյանը։