Ձեր վստահելի աղբյուրը

Հաշմանդամություն ունեցող անձանց իրավունքների պաշտպանության ոլորտում մենք շատ անելիքներ ունենք,- «Աշխարհն առանց արգելքների» խորագրով  միջազգային գիտաժողովի բացմանն ունեցած ելույթում ասաց  ՀՀ աշխատանքի և սոցիալական հարցերի նախարարի տեղակալ Ջեմմա Բաղդասարյանը:

«Այն, ինչ արել ենք, արձանագրում ենք, բայց շատ լավ գիտակցում ենք, որ մատչելիության ապահովման, իրավունքների պաշտպանության հարցերում դեռ շատ անելիքներ ունենք»,- ասաց փոխնախարարը՝ միաժամանակ հավելելով, որ հաշմանդամություն ունեցող անձնանց սոցիալական ներառումը ՀՀ կառավարությունը ճանաչել է գերակա ուղղություն:

Ջ. Բաղդասարյանի խոսքով՝ այսօրվա համաժողովի թեման, նախատեսվող քննարկումները արդիական են բոլոր երկրների համար՝ անկախ զարգացման աստիճանից:

«Հաշմանդամություն ունեցող անձանց իրավունքների պաշտպանության, հավասար պայմանների, կրթության, աշխատանքի իրավունքի ապահովմանն  ուղղված քայլերն  իրականացվում են ողջ աշխարհում»,- նշեց փոխնախարարը՝ հավելելով, որ բոլորի նպատակն է՝ ստեղծել հասարակություն բոլորի համար, որտեղ հաշմանդամ մարդը կապրի լիարժեք կյանքով:

Երևանում անցկացվող անդրանիկ միջազգային երկօրյա գիտաժողովը նվիրված է Հաշմանդամություն ունեցող անձանց իրավունքների մասին ՄԱԿ-ի կոնվենցիայի իրականացմանը: 

Գիտաժողովին ելույթներով հանդես են եկել նաև ՄԱԿ-ի մշտական համակարգող Բրեդլի Բուզետտոն, ԱՄՆ ՄԶԳ հայաստանյան առաքելության ղեկավար Դեբորա Գրիզերը և տարբեր գերատեսչությունների ներկայացուցիչներ: