Ձեր վստահելի աղբյուրը

Ազգային ժողովի պատգամավոր, Հանրապետական խմբակցության անդամ Հակոբ Հակոբյանը (Թունելի Հակոբ) ԱԺ արտահերթ նիստում կառավարության ծրագրի քննարկման ժամանակ շնորհակալություն հայտնեց կառավարության ղեկավարին, որ «չի պարտադրել» իրենց կարդալ 500 էջ և բավարարվել է  էջ և բավարարվել է 33 էջով։

Նկատենք՝ նախկին վարչապետ Հովիկ Աբրահամյանը խորհրդարանի դատին ներկայացրած ծրագիրը 500 էջից էր կազմված։

«Ծրագիրը շատ կարճ է ստացվել, որովհետև ծրագրում դրված նպատակները խորն են», -նշեց գործարար պատգամավորը։

Փոքրածավալ ծրագրի էջերում, ասաց, խորասուզվել է և եզրակացրել. «Եթե ուզում ես առողջ հասարակություն ունենալ և փողը չծախսել դեղերի վրա, ապա պետք է ունենալ առողջ քաղաքացու ապրելակերպ։ Եթե ուզում ես պատասխանատու, բանիմաց, խելամիտ քաղաքականություն ունենալ, ապա պետք է փողը ծախսես կրթության վրա և ոչ թե վաղվա քաղաքացու անգործության և չիմացության վրա։ Եթե ուզում ես պատրանք չլինի և դու միշտ հաղթող լինես, ապա պետք է փող ծախսես ուժեղ բանակ ունենալու վրա։ Եթե ուզում ես անկախ պետություն լինել և ուժեղների հետ շփվել, ապա դու պետք է բոլորի հետ շփվես և ուժեղ լինես»։

Իշխանական պատգամավորի խոսքով, հասարակության չարիքը՝ աղքատությունը, վերացնելու համար պետք է մի քանի քայլ կատարել՝ կրճատել պետական ապարատը, որովհետև «նրանք իրոք, հավելյալ արժեք չեն ստեղծում», ազատված մարդկանց համար ստեղծել աշխատատեղ։

«Աշխատանքի իմաստը ծրագրով բաժանված է հետևյալ սկզբունքով՝ հողի ապրող մարդը պետք է զբաղվի հողագործությամբ, սա առաջնային սկզբունք է, քաղաքում ապրող բնակիչը պետք է կրթություն ստանա այնքան, որ կարողանա զբաղվել փոքր ու միջին բիզնեսով։ Եթե ուզում ես, որ քո հասարակությունը լավ ապրի, ապա բոլորը պետք է մասնակցեն հավելյալ արդյունք ստեղծելուն», -հայտարարեց Հակոբյանը։

Նկատենք, որ այս պատգամավորը Երևան եկել է Մարտունու շրջանի Ծովինար գյուղից։ 2012թ. մայիսի 6-ին մեծամասնական ընտրակարգով Ազգային ժողովի պատգամավոր է ընտրվել թիվ 24 ընտրատարածքից։